Говьсүмбэрт болсон 5.5 магнитудын хүчтэй газар хөдлөлтийн чичирхийлэл 2021 оны гуравдугаар сарын 23-ны өдрийн 22 цаг 46 минутад Улаанбаатарт мэдрэгдсэн талаар ОБЕГ-аас мэдээллээ.

Одон орон, геофизикийн хүрээлэнгийн Газар хөдлөлт судлах салбарын дарга М.Өлзийбат:

-Улаанбаар хотод өчигдөр олон хүнд газар хөдлөлт мэдрэгдлээ. 2021 он гарсаар нийтдээ 58 мянган газар хөдлөлт Монгол орны газар нутаг болон хил орчмын бүсэд болсон. Үүнээс хүнд мэдрэгдэхүйц 3.5 магнитудаас дээш газар хөдлөлт 14 удаа бүртгэгдсэн. Урьд шөнийн Говьсүмбэр аймгийн Баянтал сумаас хойд зүгт 16км-ын зайд 5.5 магнитудын хүчтэй болсон газар хөдлөлт нь 14 дэхь газар хөдлөлт болж бүртгэгдэж байна. Тус бүсэд урьд өмнө ийм хүчтэй газар хөдлөлт болж байгаагүй. 

Голомтдоо 6-7 баллын хүчтэй мэдрэгдсэн байна. Улаанбаатарт 3-5 баллын газар хөдлөлтийн чичирхийлэл мэдрэгдсэн гэсэн урьдчилсан тооцоолол байна.
Улаанбаатар хот барилга байгууламж болон хүн амын нягтаршил ихтэй тул нийслэлийг тойрсон гурван байршилд анхааруулах систем байршуулсан байдаг.
Энэ нь зөвхөн Улаанбаатар хотын иргэдэд зориулагдсан бөгөөд гамшиг учрах хэмжээний 6-7 баллын хүчтэй газар хөдлөлт болсон тохиолдолд газар хөдлөлт болохоос нэг минутын өмнө анхааруулж дуут дохиоллын систем дуугарна гэв. 

---