Бүгд Найрамдах Конго Улсын Ерөнхийлөгчийн сонгуулийн сөрөг хүчний гол өрсөлдөгч Гай Брис Парфиат Колелас энэ сарын 21-ний өдөр болсон сонгуулийн санал хураалт дууссанаас хэдхэн цагийн дараа нас баржээ.

Тэрээр коронавирусийн цар тахлаар өвчлөн, эмнэлэгт хэвтэн эмчлүүлж байсан юм. Колеласын сонгуулийн кампанит ажлын багийн зүгээс түүний биеийн байдал хүндэрсэн бөгөөд Франц руу нүүлгэн шилжүүлнэ хэмээн өнгөрөгч ням гарагт мэдэгдсэн билээ. Гэвч 61 настай Колелас нүүлгэн шилжүүлгийн үеэр таалал төгссөн болохыг түүний хэвлэлийн төлөөлөгч даваа гарагт мэдэгдсэн байна.

Колелас өнгөрсөн долоо хоногт эмнэлгийн орон дээрээсээ бичлэг хийн цацаж, иргэдээ сонгуульд идэвхтэй оролцохыг уриалсан юм. Тэрээр хүчилтөрөгчийн маскаа түр тайлаад, "Эрхэм хүндэт иргэдээ, би үхэлтэй тэмцэж байна. Гэсэн хэдий ч би та бүхнийг өөрчлөлтийн төлөө саналаа өгөхийг хүсэж байна. Тэгвэл би хий дэмий тэмцээгүй байх болно" хэмээн ярьжээ.

Тус улсын Ерөнхий сайд асан Бернард Колеласын хүү Гай Брис Парфиат Колелас нь 2016 оны Ерөнхийлөгчийн сонгуульд хоёрдугаар байрт бичигдэж байжээ. Тэрээр энэ удаагийн сонгуулиар ч мөн 36 жилийн засаглалаа сунгахаар эрмэлзэж буй Ерөнхийлөгч Денис Сассу Нгессогийн гол өрсөлдөгч байсан юм.

Эх сурвалж: Reuters

---