Төв Америкийн Бүгд найрамдах Сальвадор улсад Олимпын эрх авахаар бэлдэж байсан серфингийн спортын шилдэг тамирчин харамсалтайгаар нас барсан тухай мэдээлжээ. 22 настай тамирчин бүсгүй бэлтгэл сургуулилалтынхаа үеэр аянганд цохиулсан байна.

Сальвадорын серфингийн холбооноос “Кэтрин Диаз нь манай улсын агуу тамирчин байсан бөгөөд агуу тамирчинтайгаа удахгүй уулзана гэж итгэж байна. Сальвадор улс эмгэнэн гашуудаж байна” хэмээн мэдэгдэл гаргажээ.  

Диаз баасан гарагийн өглөө гэрийнхээ ойролцоо Эль Танкод далайн усанд серфингийн сургуулилалтаа хийхээр орсон байна. Онцгой байдлын аврагчид түүнийг далайн эрэгт гаргаж амь насыг нь аврахыг оролдсон боловч чадаагүй ажээ.

Энэ тавдугаар сард Сальвадорт дэлхийн серфингийн тэмцээн болох бөгөөд Кэтрин Диаз уг тэмцээнд оролцож Олимпын эрхээ авахаар бэлдэж байжээ. Диазыг сургуулилалт хийх үед цаг агаар тогтуун, салхи шуурга, аянга цахилгаангүй байсан боловч гэнэт цаг агаар муудсан гэж Испанийн хэвлэлүүдэд бичжээ.

Олон улсын серфингийн холбоо Сальвадорын шилдэг залуу тамирчны үхэлд эмгэнэл илэрхийлсэн байна.

Эх сурвалж: The Guardian

---