УИХ дахь АН-ын бүлэг ээлжит хуралдаанаараа хэлэлцсэн асуудлын талаар мэдээлэл өглөө.

УИХ дахь АН-ын бүлгийн дарга Д.Ганбат:

-УИХ дахь АН-ын бүлэг нэн яаралтай өргөн барих хоёр хуулийн талаар хэлэлцсэн. Эхний ээлжинд Шилэн дансны тухай хуулийг нэмэлт, өөрчлөлт оруулах ёстой гэж үзлээ. Уг асуудлаараа Засгийн газарт санал хүргүүлсэн ч уг хуулийг өөрчлөх шаардлагагүй гэж үзжээ. 

Нөгөө нь өндөр настны тэтгэврийн доод хэмжээг 500 мянгад хүргэх ёстой гэсэн хуулийн төслийн саналыг мөн Засгийн газарт оруулсан. Засгийн газар уг хуулийг ч мөн хүлээн зөвшөөрөөгүй. Иймд УИХ дахь АН-ын бүлэг уг хоёр хуульд нэмэлт, өөрчлөлт оруулах ёстой гэдэгт санал нэгдсэн. Нийгмийн даатгалын санд өртэй байгаа компаниудаар өрийг нь төлүүлж, НДС-аа өр зээлгүй болгоод ахмадуудынхаа тэтгэврийг нэмэх ёстой. Одоо мөнгө үнэгүйдээд ахмадууд амьдрах аргагүй болж байна.

Мөн бид Засгийн газраас хэрэгжүүлж буй 10 их наядын хөтөлбөр УИХ-ын хяналтаас гадуур байгааг эсэргүүцэж байна. Энэ хөтөлбөрт анхаарал хандуулж, зөв асуудалд зарцуулахад анхаарах ёстой гэж үзэж байна.

-Шилэн дансны тухай хуульд оруулах гол заалт юу вэ?

-Одоо хэрэгжиж буй хуулиар 5 сая төгрөгөөс дээш гүйлгээг хянадаг. Шинэ өөрчлөлтөөр төрийн байгууллагуудын нэг саяаас дээш бүх гүйлгээг хянадаг байх зохицуулалт орно.

-Тэтгэврийн доод хэмжээг 500 мянга болгох эх үүсвэрийг хаанаас гаргах ёстой гэж үзэж байна?

-НДС-ийн мөнгийг хариуцлагатай байршуулж, хүүг нь тооцдог бай. Хэдэн зуун тэрбумын өрөө төлүүл. Тэгээд тэтгэврээ нэмэх хэрэгтэй гэж үзэж байна.

---