Пакистаны Ерөнхий сайд Имран Хан коронавирусийн халдвар авсан болох нь өнгөрөгч бямба гарагт тогтоогджээ. Тэрээр үүнээс хоёр хоногийн өмнө коронавирусийн эсрэг вакцины эхний тунгаа тариулаад байсан юм.

Тус улсын Засгийн газрын төлөөлөгчид иргэдийг энэ явдлаас болж вакцин хийлгэхээс татгалзахгүй байхыг уриалсан байна. Пакистаны цар тахлын эсрэг вакцинжуулалт нь олон нийтийн дунд өргөн тархсан эргэлзээтэй тулгараад байгаа бөгөөд Хан халдвар авсан нь 220 сая хүн амтай тус улсын дархлаажуулалтын аянд сөргөөр нөлөөлж магадгүй гэж эрүүл мэндийн мэргэжилтнүүд үзэж байгаа аж.

68 настай Имран Хан бага зэрэг халууран, ханиалгаж байгаа хэдий ч биеийн байдал нь сайн байгаа бөгөөд гэртээ тусгаарлалтад байгаа гэж Эрүүл мэндийн сайд Файсал Султан мэдээлжээ. Тэрээр мөн Ерөнхий сайд Ханыг өнгөрсөн долоо хоногийн пүрэв гарагт вакцин хийлгэхээсээ өмнө коронавирусийн халдвар авсан байх өндөр магадлалтай хэмээн тэмдэглэсэн байна.

Имран Хан ямар вакцин тариулсан нь тодорхойгүй байгаа хэдий ч Пакистан улс одоогоор зөвхөн БНХАУ-ын "Синофарм" группийн үйлдвэрлэсэн вакциныг хэрэглэж байгаа юм.

Тус улсад өнөөдрийн байдлаар коронавирусийн халдварын нийт 627,000 тохиолдол бүртгэгдэн, 13,843 хүн нас бараад байна.

Эх сурвалж: Reuters

---