Умард Солонгос Малайз улстай дипломат харилцаагаа тасалж байгаагаа өнөөдөр зарлав. Энэ нь Малайз улсын эрх баригчид Умард Солонгосын гэмт хэргийн сэжигтнийг АНУ-д шилжүүлэн өгөхийг зөвшөөрсөн шийдвэртэй холбоотой юм.

БНАСАУ-ын Гадаад хэргийн яамны мэдэгдэлд "Малайз улсад амьдардаг Умард Солонгосын иргэнийг АНУ-ын эрх баригчид мөнгө угаасан гэх хэрэгт буруутгаж байгаа нь манай төрийн гол дайсны илт зохион байгуулалт бөгөөд байж боломгүй худал хуурмаг зүйл. АНУ-ын шахалтад захирагдан, Умард Солонгосын эсрэг асар том дайсагнасан үйлдэл хийсэн Малайз улстай дипломат харилцаагаа бүр мөсөн зогсоохоо мэдэгдэж байна. АНУ энэ хэргийнхээ төлөө зохих үнийг төлөх болно" хэмээн анхааруулжээ.

Умард Солонгос нь дипломат ажилтнуудаа Малайзаас гаргах эсэх, эсвэл хэзээ гаргах нь тодорхойгүй байна. Малайзын Гадаад хэргийн яамны вэбсайтад Умард Солонгосын Элчин сайдын яамыг Ким Ю Сонг болон бусад зургаан ажилтан удирддаг гэж мэдээлсэн байна. Харин Умард Солонгост одоогоор Малайзын дипломат ажилтан байхгүй гэж ажиглагчид үзэж байгаа юм.

Тус улс Малайз улстай дипломат харилцаагаа тасалж байгаа нь ноцтой арга хэмжээ юм. Малайз нь Умард Солонгосын эдийн засгийн чухал талбар байсаар ирсэн бөгөөд худалдаа наймаа, ажиллах хүчний экспорт болон Зүүн Өмнөд Ази дахь хууль бус бизнесүүд зэрэг чухал ач холбогдол бүхий харилцаатай байсан аж.

Хоёр улс анх 1973 онд дипломат харилцаа тогтоосон боловч тэдний харилцаа сүүлийн хэдэн жилд ихээхэн хурцдаад байгаа юм. Умард Солонгосын удирдагч Ким Жон Уны ах Ким Жон Нам 2017 онд Куала Лумпурын олон улсын нисэх онгоцны буудалд хордон амиа алдсанаас хойш хоёр улсын харилцаа бараг царцаад байсан билээ.

Эх сурвалж: Associated Press

---