УИХ-ын гишүүн Б.Энх-Амгалан, Ч.Ундрам, Г.Дамдинням, Ц.Сандаг-Очир нар ҮАБЗ-ийн ажилчид улсын хилээр их хэмжээний ам.доллар оруулж ирсэн асуудлаар ХЗДХ-ийн сайд Х.Нямбаатарт шаардлага гардууллаа. 

УИХ-ын гишүүн Б.Энх-Амгалан: 

-Монгол улсын ҮАБЗ-ийн ажилтнууд энэ онд Алтанбулаг боомтоор нэвтэрч тусгай чиг үүрэг гүйцэтгэсэн. Буцаж орж ирэхдээ ихээхэн хэмжээний мөнгө оруулж ирсэн мэдээлэл гарсан. ҮАБЗ-ийн тухай хуулиар эдгээр хүмүүс гадаад улсад тусгай үйл ажиллагаа явуулах чиг үүрэг байхгүй. Бид ТЕГ-т хандсан. Өнөөдөр бид хариугаа авна. Б.Баасанцогт өмгөөлөгчийн асуудал мөн яригдаж байгаа. Энэ хүний компьютерээс хуйвалдааны тухай мэдээлэл гарсан. Зарим албан хаагчидтай нийлж наргиж, цэнгэдэг, өгч авалцдаг сүлжээ бий болсон байна. Ардчилсан монгол оронд мафийн систем байж болохгүй. Хүний эрх зөрчиж, эрүүдэн шүүдэг, ял тулгадаг байж болохгүй. Энэ асуудлыг бид хэвлэл мэдээллийн ачаар мэдэж авсан. Иймд энэхүү шаардлагаа Хууль зүйн сайд Х.Нямбаатарт гардуулан өгч байна. Шаардлагын хариуг энэ сарын 21-ний дотор авна. УИХ дээр ҮАБЗ-тэй холбоотой асуудлаар ажлын хэсэг гарсан. 

УИХ-ын гишүүн Ч.Ундрам: 

-Шударга ёсыг тогтоохын төлөө бид ажиллаж байна. "Ариг" банкийг дээрэмдэх схем өмгөөлөгч Б.Баасанцогтын компьютерээс олдсон. Хувь хүний өмчийг зохион байгуулалттай дээрэмддэг зүйл байж болохгүй. Бид ТЕГ, ЦЕГ, АТГ-т хүсэлт өгсөн. Бид өнөөдөр хариугаа авна. Иймээс ХЗДХ-ийн сайд Х.Нямбаатар сайдад албан бичиг өгч байгаа юм.

УИХ-ын гишүүн Г.Дамдинням:

-Өмгөөлөгч Б.Баасанцогт ҮАБЗ-ийн гишүүдтэй, тэр дундаа НБД А.Гансүхтэй холбоо сүлбээтэй гэдэг нь батлагдсан. Шүүгчид рүү 10-24 сая төгрөг шилжүүлсэн баримт нь гарч ирсэн. Шүүгчийн тухай хуулиар шүүгч хүн хэргийн нөгөө талын оролцогч болох өмгөөлөгчөөс мөнгө төгрөг авах, тал тохой татахыг хориглосон байдаг. Шүүгч хүн өмгөөлөгчөөс ямар ч тохиолдолд мөнгө авч болохгүй. Үүнийг хууль, хяналтын байгууллага яагаад шалгахгүй байна вэ?! 

УИХ-ын гишүүн Ц.Сандаг-Очир: 

-ҮАБЗ-ийн ажилчид тусгай чиг үүргээр явсан гэж НБД А.Гансүх мэдэгдсэн. ҮАБЗ-ийн НБД А.Гансүх л ийм статустай. Бусад нь захиргааны албан хаагчид учир тусгай чиг үүрэгтэй хүмүүс биш. Энэ их мөнгө хаачив? Ямар зорилготой мөнгө вэ? 

Б.Баасанцогтын компьютерээс гарсан гэмт хэргийн схем бол уншаад, гайхаад өнгөрөх асуудал биш. Зарим хэрэг энэ схемийн дагуу шийдэгдсэн байна. Үүнийг яагаад шалгахгүй байна вэ? 

ХЗДХ-ийн сайд Х.Нямбаатар: 

-Шударга бусын хонгилыг нураахаар бид тэмцэж байсан. Гэтэл энэ нь нураагүй байгаа нь сүүлийн үед хэвлэл мэдээллийн хэрэгслээр гарч байгаа баримтууд харуулж байна. Өмгөөлөгч Б.Баасанцогтоос шүүгчид рүү мөнгө шилжүүлсэн асуудлыг цагдаагийн байгууллага шалгаж эхэлсэн. Одоогоор хэрэг бүртгэлийн хэрэг нээгээд байна. 

---