ОХУ-ын нийслэл Москва хотын баруун хэсгийн гудамжинд явж байсан хүнийг хөнөөсөн этгээд хий юм хардаг байсан гэж хууль сахиулах байгууллагын эх сурвалж "РИА Новости" агентлагт мэдээлжээ.

Цагдаагийн байгууллагын төлөөлөгч "Хэрэг гарах үеэр сэжигтэн хажуугаар нь өнгөрч явсан хүний ​​оронд "шулам" харсан гэж тайлбарласан бөгөөд үүний улмаас түүнийг хөнөөхөөр шийдсэн гэж мөрдөн байцаалтын үеэр мэдүүлсэн" хэмээн ярьжээ.

Гэмт хэрэг мягмар гарагийн шөнө Довженкогийн гудамжинд гарсан юм. Мөрдөн байцаах хорооны мэдээлснээр сэжигтэн гудамжаар алхаж явсан залууг алхаар цохиж хөнөөсөн бөгөөд удалгүй баривчлагдсан байна.

Сэжигтэн нь 1997 онд төрсөн Санкт-Петербургийн уугуул иргэн аж. Албаныхан түүнийг гэмт хэрэг үйлдэх үедээ ямар байдалтай байсныг тогтоохоор сэтгэлзүйн болон сэтгэл мэдрэлийн шинжилгээ хийхээр төлөвлөж байна.

Эх сурвалж: Риа Новости

---