Их Британийн Оксфордын их сургуулийн гаргаж авсан "АстраЗенека" вакцин нь цусны бүлэгнэл, бөөгнөрөл үүсгэж магадгүй гэх мэдээллийн улмаас Ирланд болон Нидерланд улсууд тус вакцины хэрэглээг зогсоожээ.

Одоогийн байдлаар дэлхий даяар "АстраЗенека" вакцины 350 сая гаруй тунг тариад байгаа хэдий ч вакцин хийлгэсэн хүмүүст цусны бүлэгнэл үүсэж байгаа талаар мэдээлэл гарсны дараа Дани, Норвеги, Болгар зэрэг улсууд тус вакцины хэрэглээг түр зогсоогоод байгаа юм. Гэвч ДЭМБ, Европын эмийг хянах байгууллага, Засгийн газар болон мэргэжилтнүүд "АстраЗенека" вакцин ба цусны бүлэгнэлтийн хооронд ямар нэгэн холбоо тогтоогдоогүй гэдгийг онцлон, тарилга аюулгүй гэж мэдэгдсэн билээ.

Норвегийн албаны хүмүүс энэ талаар санаа зовниж байгаагаа мэдэгдсэний дараа Ирландын вакцины зөвлөл хуралдан, тус вакцины хэрэглээг түр зогсоохыг санал болгосон гэж Ирландын Эрүүл мэндийн яамны төлөөлөгч хэлжээ. Нидерландын Эрүүл мэндийн яам ч мөн урьдчилан сэргийлэх үүднээс адил арга хэмжээ авч байгаагаа мэдэгдсэн юм.

Норвеги улсад "АстраЗенека" вакцин тариулсан иргэдийн дунд дотуур цус алдах явдал бүртгэгдэж байгаа бөгөөд залуу хүмүүст хүнд хэлбэрийн цусны бүлэгнэл эсвэл тархины цус алдалт илэрсэн талаар албаныхан мэдээлсэн байна. 17 сая гаруй тунгийн тарилгаас бүртгэгдсэн эдгээр тохиолдлуудад дүн шинжилгээ хийсэн "АстраЗенека" компанийн зүгээс тус вакцин нь цусны бүлэгнэл үүсэх эрсдэлийг нэмэгдүүлсэн гэх шинж тэмдэг илрээгүй хэмээн мэдэгдсэн юм.

Эх сурвалж: AFP

---