Т.Чимэгээг эрүүдэн шүүсэн асуудлаар нийтийн сонсгол хийх талаар УИХ-ын гишүүн Ц.Мөнхцэцэг, Г.Амартүвшин нар мэдээлэл хийлээ.

УИХ-ын гишүүн Ц.Мөнхцэцэг "Монгол улсын үндсэн хууль болон МУ-ын нэгдэн орсон хүний эрхийн гэрээ конвенцуудад зааснаар хүний эрхийн зөрчил болох иргэн Т.Чимгээгийн асуудлаар УИХ-ын хүний эрхийн дэд хороо болон УИХ гишүүд мэдээлэл хийж байна.

Иргэн Т.Чимгээгийн асуудал нь С.Зориг агсны асуудлаас тусдаа ба эрүүдэн шүүсэн нь хүний эрхийн зөрчил гэж үзэж, ОУ-ын болон дотоодын хүний эрхийн байгууллагуудад хандаж, тус асуудлыг хөндөж байна. УИХ үндсэн хуульд заасан бүрэн эрхийнхээ дагуу хүний эрхийн зөрчлийн асуудлаар нийтийн ерөнхий сонсгол хийж, тухайн асуудлыг олон нийтэд дэлгэн тавьж, хүний эрхийн зөрчлийг арилгуулах үүрэгтэй байдаг. Нийтийн сонсгол хийх албан хүсэлтийг УИХ-ын гишүүн Ц.Мөнхцэцэг болон Г.Амартүвшин УИХ-ын даргад өргөн барина. 

Ардчилсан 30 жилийн хугацаанд хүний эрхийг дээдэлсэн Монгол улсад эмэгтэй хүнийг харгис хэрцгий аргаар эрүүдэн шүүсэн энэ тохиолдолд бид эвлэрэн суух ёсгүй. Ерөнхий сайд энэ асуудлыг онцгойлон анхаарч, олон нийтийн өмнө сөхөж тавьсан ч шийдэгдэхгүй байна. Тиймээс нийтийн сонсголын дагуу гарсан санал зөвлөмжийг үндэсний аюулгүй байдлын зөвлөлд хүргүүлнэ" гэв.

---