Казахстаны төрийн аюулгүй байдлын агентлагийн нисэх онгоц өнгөрөгч бямба гарагт осолдож, багийн дөрвөн гишүүн амиа алдан, хоёр хүн гэмтсэн гэж албаныхан мэдээлжээ.

Амьд үлдсэн хоёр хүнийг яаралтай эмнэлэгт хүргэсэн болохыг тус улсын Онцгой байдлын яамнаас мэдэгдсэн юм. Зөвлөлтийн үед үйлдвэрлэсэн хоёр сэнсэн хөдөлгүүрт "Ан-26" онгоц нь Казахстаны хамгийн том хот болох Алматыгийн нисэх онгоцны буудалд газардах гэж байгаад осолдсон байна. Онгоц тус улсын нийслэл Нур-Султанаас хөөрсөн бөгөөд зөвхөн зургаан багийн гишүүдийг тээвэрлэж явжээ.

Тус онгоцыг Казахстаны Үндэсний аюулгүй байдлын хороо эзэмшдэг бөгөөд одоогоор ослын шалтгааныг шалгах ажиллагаа үргэлжилж байна.

"Ан-26" онгоцыг 1960-аад онд зохион бүтээсэн бөгөөд иргэний болон цэргийн зориулалтаар маш олон тоогоор үйлдвэрлэжээ. Хуучин Зөвлөлт холбоот улсууд болон дэлхийн бусад улс оронд эдгээр онгоц нь өнөөг хүртэл хэдэн зуугаараа байдаг аж.

Эх сурвалж: Associated Press

---