Нидерланд улсын Гааг хотын төв цэцэрлэгт хүрээлэнд Засгийн газрын коронавирусийн эсрэг авч хэрэгжүүлж буй арга хэмжээ, хөл хориог эсэргүүцсэн иргэдийн жагсаал өнгөрсөн амралтын өдөр болсон байна. Жагсагчдыг тараахын тулд хэв журам сахиулах цагдаа нар даралтат усаар шүршжээ.

Ковид-19-ийн хөл хорио болоод Засгийн газраас хэрэгжүүлж буй бусад бодлогыг эсэргүүцсэн 2,000 гаруй иргэн хотын төвд жагссан. Жагсаалын төгсгөлд зарим иргэн цэцэрлэгт хүрээлэнг орхихоос татгалзсан байна. Тэдгээр иргэдийг тараахаар цагдаагийн офицерууд, хэв журам сахиулах цагдаа нар бороохойгоор зэвсэглэн, ноход дагуулан хөөжээ.

Тус улсад цагдаа нар дээд тал нь 200 хүн нэг дор цуглаж жагсахыг зөвшөөрсөн бөгөөд уг тоог хэтрүүлсэн тохиолдолд албадан хүч хэрэглэж тараахаа анхааруулсан байна. Жагсаалыг өргөн хүрээнд хамруулахгүйн тулд Гааг хотод галт тэрэгний хөдөлгөөнийг зогсоожээ. Зарим бичлэгээс харахад цагдаа жагсагч руу халдаж зодож байсан бөгөөд хэд хэдэн жагсагчийг баривчлан саатуулсан байна.

Өнөөдөр Нидерландын иргэд эрх баригчдаа сонгох, сонгуулийн санал хураалтад оролцож эхэлнэ. Сонгууль энэ сарын 17-ны лхагва гарагт товлогдсон боловч коронавируст цар тахлын нөхцөл байдлын улмаас тархалтыг нэмэгдүүлэхгүйн тулд гурав хоног үргэлжлэхээр болжээ.

Нидерланд улсад өнгөрсөн нэгдүгээр сараас хойш оройн 21:00 цагаас өглөөний 04:30 цаг хүртэл шөнийн цагаар хөл хорионы дэглэмж хэрэгжиж байгаа. Дэлхийн хоёрдугаар дайны үед нацист дэглэм оршин тогтнож байснаас хойш анх удаа хөл хорионы дэглэмийг нидерландчууд баримталж байна. Зоог, цэнгээний газрууд, хүнсний бус дэлгүүрүүд хаалттай хэвээр, хоёроос дээш хүн нэг дор цуглахыг хориглосон байгаа юм.

Жон Хопкинсын их сургуулийн судалгаагаар коронавируст цар тахлаар сая гаруй хүн өвчилж, 16,000 гаруй хүн нас бараад байна.

Эх сурвалж: ВВС

---