ЭМЯ-наас коронавирусийн нөхцөл байдлын мэдээг 2021 оны 03 дугаар сарын 14-ны өдрийн 11:00 цагийн байдлаар танилцууллаа.

ХӨСҮТ-ийн Халдварт өвчний тандалт судалгааны албаны дарга Ж.Байгальмаа: Сүүлийн 24 цагийн хугацаанд нийт 17,894 сорьцод шинжилгээ хийхэд коронавируст “Ковид-19” халдварын 128 шинэ тохиолдол илэрч, нийт батлагдсан тохиолдлын тоо 3,961 боллоо. Дотоодод халдвар авсан хүний тоо 3,430 болж байна.

Шинээр халдвар авсан хүмүүсээс Улаанбаатар хотод 127 хүн нэмэгдэж, нийслэлийн нийт өвчлөл 3,085 болсон. 3 дугаар сарын 4-ний өдрийн Будапештын онгоцоор ирсэн нэг хүний давтан шинжилгээнд коронавируст халдвар илэрч, зөөвөрлөгдсөн тохиолдол 423 боллоо.

Сүүлийн 24 цагт 46 хүн эмчлэгдэж, нийт эдгэрсэн хүний тоо 3,001 болсон. Шинээр халдвар авсан 128 хүнээс 122 нь ойрын хавьтал байна. Эдгээрээс 112 хүнд эхний шинжилгээгээр халдвар илэрсэн бол, 10 хүнд хоёр дахь удаагийн шинжилгээгээр илэрсэн бол 5 хүний халдварын эх уурхайг тодорхойлох хавьтал судлалын үйл ажиллагаа явагдаж байна.

Эдгээр иргэдийн оршин суугаа байршил:

Баянзүрх дүүрэг 5-р хороо,
Сонгинохайрхан дүүрэг 7-р хороо,
Чингэлтэй дүүргийн 4-р хороо,
Сүхбаатар дүүргийн 11-р хороо 

Завхан аймагт батлагдсан тохиолдол одоогийн байдлаар дөрөв байна. Ойрын хавьтлын бүх хүмүүсийг тусгаарлалтад авч, ажиглалтад байлгаж байна. Төв аймгийн нийт батлагдсан тохиолдол 15 болсон. Ойрын хавьтлуудыг мөн ажиглалтад авсан байна.

Өнөөдрийн байдлаар ХӨСҮТ, Цэргийн төв эмнэлэг, Эх нярай, эмэгтэйчүүдийн үндэсний 2 дугаар төв, Завхан болон Төв аймгийн нэгдсэн эмнэлэгт нийт 943 хүн эмчлүүлж байгаагаас 872 хүний биеийн байдал хөнгөн, 63 хүн хүндэвтэр, 6 хүн хүнд, 2 хүн нэн хүнд байдалтай байна.

Сүүлийн өдрүүдэд Улаанбаатар хотод халдварын тархалт эрчимтэй явагдаж байгаа энэ цаг үед нийгмийн харилцаагаа аль болох багасгах хэрэгтэй байна. Албан байгууллагуудын хувьд ажилчдынхаа байгууллага дээрээ биеэрээ ирж ажиллах хүмүүсийн дотоод зохион байгуулалтыг багасгах, угаалга цэвэрлэгээг тогтмол хийх, агаар сэлгэлт хийх зэрэг үйл ажиллагааг хэрэгжүүлэх хэрэгтэй байна.

ЭМЯ-ны Хэвлэл мэдээллийн зөвлөх Б.Ууганбаяр: Энэ сарын 15-наас эхлээд иргэдийг эрсдэлтэй насны бүлгээр нь ангилж, вакцинжуулалтад хамруулахаар болсон. Нэг ёсондоо ахмад настнуудыг вакцинжуулах ажил маргаашаас төлөвлөгөөний дагуу явагдана. Мөн худалдаа үйлчилгээ, үйл ажиллагаа нь зогсож болохгүй салбарууд болон багш нарын вакцинжуулалтын ажил үргэлжилж байна.

---