Бразил улсад коронавирусийн дараагийн давлагаа эхэлж, хоногт 2,000 гаруй хүн нас барсан тохиолдол бүртгэгджээ. Тус улс нь коронавирусийн эндэгдлийн тоогоор АНУ-ын дараа хоёрдугаарт бичигдэж байна. Бразилд 270,000 орчим хүн нас барсан бөгөөд лхагва гарагийн байдлаар хоногт 2,286 хүн нас баржээ.

Ковид-19-ийн мутацид орж хувирсан хэлбэр хурдан халдварлаж байгаа нь нөхцөл байдлыг хүндрүүлж байна гэж шинжээчид үзэж байна.

2003-2011 оны хооронд тус улсын 35 дахь Ерөнхийлөгчөөр ажиллаж байсан Луйз Инакио Лула да Сильва одоогийн төрийн тэргүүн Жайр Болзонарогийн коронавирустэй тэмцэж буй арга барилыг “тэнэг, мулгуу” хэмээн хурцаар шүүмжлэн буруутгажээ.

Яг жилийн өмнө ДЭМБ коронавирусийг цар тахал хэмээн дэлхий дахинд зарласан. 2021 он бразилчуудын хувьд хүнд жил болохыг эмч мэргэжилтнүүд анхааруулжээ. Лхагва гарагт 2,000 гаруй иргэн нас барсны зэрэгцээ коронавирусийн халдварын 80,000 шинэ тохиолдол бүртгэгдсэн байна.

Тус улсад эрүүл мэндийн тогтолцоо сул, эмнэлгийн байшин барилгууд нурах шахсан тухай эмч мэргэжилтнүүд гомдол мэдүүлсээр байгаа юм. Рио де Жанейро, Сан Пауло зэрэг 15 мужийн нийслэлүүдэд яаралтай түргэн тусламжийн тасгууд 90 гаруй хувийн дүүргэлттэй ажиллаж байна.

Урьдчилсан судалгаагаар Бразил улсад хурдацтай, өргөн хүрээг хамарч тархаад байгаа Р1 коронавирусийн шинэ хувилбарын тархах чадвар хоёр дахин өндөр байна гэжээ. Тус улсын Засгийн газар Оксфорд-АстраЗенека болон КоронаВак вакцинуудаас 200 сая гаруй тунг захиалсан. Одоогоор хүн амын дөрвөн хувь буюу найман сая гаруй иргэн вакцины эхний тунг тариулжээ.

Эх сурвалж: ВВС

---