ОХУ-д "Биометрия" нэртэй гар утасны аппликейшнийг нэвтрүүлэх бөгөөд иргэд өөрсдийн био хэмжүүрийн мэдээллээ бүртгүүлэн, төрөл бүрийн үйлчилгээг цахим хэлбэрээр авах боломжтой гэж энэхүү системийн оператор "Ростелеком"-ын зүгээс мэдэгджээ.

Био хэмжүүрийн үндсэн дээр иргэд "нүүр царайгаараа" төлбөрөө хийн, цэнгэлдэх хүрээлэн дэх олон нийтийн арга хэмжээнд оролцож, үүрэн холбооны оператор компаниудтай гэрээ байгуулан, нотариатын үйлчилгээ авч, их дээд сургуулиудад зайны шалгалт өгөх боломжтой аж. "Ростелеком"-ын төлөөлөгч "Эдгээр арга хэмжээ нь Биометрийн нэгдсэн системийн мэдээллийн санд илүү олон хүн илүү хурдацтай бүртгүүлэх боломжийг бүрдүүлнэ" хэмээн ярьжээ. Цаашид нийгмийн эрэлт хэрэгцээнд үндэслэн тус системийн хэрэглээний цар хүрээг өргөжүүлэн хөгжүүлэх гэнэ.

Түүнчлэн Оросын эрх баригчид био хэмжүүрийн мэдээллээ Засгийн газарт өгөөгүй иргэдэд төрийн зарим үйлчилгээг алсаас хүргэхээс татгалзах төлөвлөгөөтэй байгаа гэж "Коммерсантъ" сонин мэдээлжээ. ОХУ-ын Дижитал хөгжил, харилцаа холбоо, олон нийтийн мэдээллийн хэрэгслийн яам өнгөрөгч хоёрдугаар сарын сүүлчээр болсон уулзалтын үеэр энэ талаар хэлэлцсэн байна. Албаныхан иргэдийн биометрийн мэдээллийг цуглуулах ажил удаашралтай байгааг хүлээн зөвшөөрч, "Асуудлыг захиргааны арга хэмжээ авах замаар шийдвэрлэх" хүсэлтэй байгаагаа илэрхийлсэн аж.

ОХУ "Биометрийн нэгдсэн систем"-ийг 2018 онд нэвтрүүлсэн бөгөөд 2021 оны хоёрдугаар сарын байдлаар нийт 164 мянган оросууд уг системд бүртгүүлээд байгаа юм. Харин эрх баригчдын төлөвлөгөөний дагуу энэ тоо 70 сая болж өсөх ёстой. Одоогийн байдлаар зөвхөн банкнууд энэхүү системийн био хэмжүүрийн мэдээллийг цуглуулах зөвшөөрөлтэй аж.

Гэвч Оросын Дотоод хэргийн яам орос, гадаадын иргэд болон харьяалалгүй хүмүүсийн биометрийн мэдээллийн санг байгуулахаар төлөвлөж байгаа нь 2020 оны арваннэгдүгээр сард ил болсон юм. Тус мэдээллийн сангаар дамжуулан хүмүүсийг царай, хурууны хээ болон геномын мэдээллээр нь таних боломжтой байна.

Эх сурвалж: DW

---