Ардчилсан намын ҮБХ хуралдаж байна. Үүнтэй холбоотойгоор ҮБХ-ны гишүүн Д.Баттулга, У.Болдхүү, П.Нүрзэд нарын байр суурийг хүргэж байна. 

АН-ын ҮБХ-ны гишүүн Д.Баттулга: 

-Би ҮБХ-ны гишүүн боловч намын удирдах түвшинд ажиллаагүй гэдгээ хэлмээр байна. АН-ын даргын сунгаанд 12 хүн нэр дэвшсэнээс 4-5 хүн үлдсэн гэсэн мэдээлэл байна. Дотоод сонгуулийн хороо энэ талаар дэлгэрэнгүй мэдээлэх байх. 

Намын даргын ажлаа өгчихөөд намыг хагаралдуулж байгаа нь харамсалтай байна. Ц.Туваан дарга Х их хурлын шинэчилсэн дүрмээ УДШ-д бүртгүүлчихгүй яав даа гэсэн харамсал бас байна. 

-АН-ын хагаралд улс төрийн нөлөө орсон гэж боддог уу? 

-УДШ шинэчилсэн дүрмийг бүртгэсэн ч юм шиг, бүртгээгүй юм шиг, Ц.Туваан, С.Эрдэнэ нарын аль алиных нь асуудлыг авч хэлэлцээгүй, дотооддоо учраа ол гээд хаячихсан нь улс төрийн нөлөө орсон гэж үзэж байгаа. 

-УИХ-ын гишүүн Н.Алтанхуягийг намын даргын сунгаанаас хассан талаар? 

-Бүртгээгүй нь зөв гэж үзэж байгаа. Хэрэв Н.Алтанхуяг АН-ын гишүүн юм бол яагаад УИХ дахь АН-ын бүлэгтээ орохгүй байгаа юм бэ?! Бүлэгтээ орсон бол өрсөлдөх эрх нь нээлттэй шүү дээ. 

АН-ын ҮБХ-ны гишүүн У.Болдхүү: 

-АН-ын их хурлыг хуралдуулах ёстой. ҮБХ-ны энэхүү хурал нь намын тамга, тэмдэгтэй ямар ч хамаагүй, өөр асуудлаар хуралдаж байна. 

АН-ын ҮБХ-ны гишүүн П.Нүрзэд: 

-Эрх баригч нар АН-ын дотоод хэрэгт хутгалдан орсон нь харагдаж байна. Та нар бүх эрх мэдлийг атгаж байгаа нь үнэн. Гэхдээ АН-ын үйл ажиллагаанд бүү хутгалдан орооч ээ. С.Эрдэнэ эрх баригч намтай нийлэн, АН-ыг ерөнхийлөгчийн сонгуульд оролцуулахгүй байх ажлыг хийж байна. АН халаасанд ордог жижиг нам биш шүү. С.Эрдэнэ дарга явуургүй үйл ажиллагаагаа зогсоох ёстой. 

---