Женевт төвтэй түүхий эдийн наймаачид болох "Mercuria Energy Group" нь Туркийн ханган нийлүүлэгчээс 36 сая ам.долларын үнээр худалдаж авсан зэсийн оронд будсан чулуу хүлээн авчээ.

Тус компани нь 10 мянган тонн хар зэс худалдаж авсан бөгөөд хүргэлт нь БНХАУ-д ирж эхлэхэд ачаа тээврийн луйврын хохирогч болсон гэдгээ ухаарсан байна. Хэдийгээр албаныхан аюулгүй байдлыг баталгаажуулан, хяналт шалгалтыг тогтмол хийсэн ч энэхүү хачирхалтай хэрэг гарсан байна.

"Mercuria" компани өнгөрсөн жил зэсийн боловсруулаагүй хэлбэр болох хар зэсийг захиалан, Хятадад хүргүүлж авахаар тохирсон аж. Ингээд Туркийн нийлүүлэгч нь 6,000 орчим тонн хар зэсийг найман усан онгоц дээрх 300 гаруй чингэлэгт хийж ачсан байна. Гэвч усан онгоцнууд Истанбулын ойролцоох боомтоос хөдлөхөөс өмнө зэсийг шүршдэг будгаар будсан хучилтын чулуугаар сольсон байжээ.

Дэлхийн хамгийн том таван газрын тосны наймаачдын нэг болох "Mercuria Energy Group" нь зэс нийлүүлэгч "Bietsan Bakir" компанийн талаар Турк, Их Британийн шүүхэд гомдол гаргаж, нөхөн төлбөр нэхэмжилж байгаа аж. Туркийн цагдаа нар хуурамч зэсийн наймаатай холбоотой хэд хэдэн хүнийг цагдан хориод байгаа гэнэ.

Эх сурвалж: BBC

---