БНХАУ Ази тив дэх Америкийн цэргийн хүчийг шахан зайлуулах ажлаа түргэтгэж байгаа тул ойрын зургаан жилийн хугацаанд Тайванийг булаан эзэлж магадгүй гэж АНУ-ын дээд командлагч мэдэгджээ.

Ардчилсан дэглэмтэй, өөртөө засах эрхтэй Тайвань нь авторитар дэглэмтэй БНХАУ-ын түрэмгийллийн аюул заналхийлэл дор оршин тогтнодог билээ. Хятадын удирдагчид энэхүү арлыг нутаг дэвсгэрийнхээ нэг хэсэг гэж үздэг бөгөөд нэг өдөр буцааж авна гэдгээ амлаж байсан юм.

Ази, Номхон далайн бүс дэх Вашингтоны цэргийн дээд албан тушаалтан, адмирал Филипп Дэвидсон "Хятад улс 2050 он гэхэд дүрэмд суурилсан олон улсын дэг журам дахь АНУ-ын манлайллыг таслан зогсоож, орыг нь эзлэх гэсэн хүсэл эрмэлзлээ биелүүлнэ гэж би санаа зовж байна. Түүнээс өмнө тэдний зорилтуудын нэг нь Тайвань гэдэг нь тодорхой. Би энэхүү аюул занал ойрын зургаан жилд үүснэ гэж үзэж байна" хэмээн АНУ-ын Сенатын хороонд мэдээлжээ.

1949 онд болсон иргэний дайны төгсгөлд Тайвань Хятадаас салан, шилжин суурьшсан хэдий ч одоог хүртэл Бээжингийн түрэмгийлэлд өртөж магадгүй нөхцөл байдалд байгаа билээ. Харин АНУ нь тус арлын хамгийн чухал албан бус холбоотон бөгөөд цэргийн түнш хэвээр байгаа юм.

Эх сурвалж: AFP

---