Энэтхэгийн Керала мужийн Триссур дүүргийн Кундувара жижиг тосгоны хүү Анужат Синду Винайлал тосгоныхоо өдөр тутмын амьдралыг харуулсан “Миний ээж ба хөршийн ээжүүд” нэртэй зургийг зуржээ. Хүүгийн ээждээ зориулж зурсан зураг олон улсын зургийн уралдааны тэргүүн байрын шагналыг хүртжээ.

Харамсалтай нь хүүг шагналаа гардаж авахын өмнөхөн ээж нь зүрхний өвчнөөр тэнгэрт хальсан байна. “Миний ээж ба хөршийн ээжүүд” нэртэй зурганд цагаан цамц, улаан банзалтай бүсгүй байшингийнхаа урд хэсгийг шүүрдэж байгаа бол өөр нэг газарт бас нэгэн бүсгүй үхэр хариулна. Тосгоны өөр нэг хэсэгт хоёр эмэгтэй тариа хураана.

Анужат хүү энэ зургаа зурахдаа ямар нэг тэмцээн уралдаанд зориулж биш, ээжийнхээ хайрыг харуулахаар зуржээ. Гэвч өнгөрсөн жил аав нь Дели дэх Шанкарын урлагийн академийн тэмцээнээс зохион байгуулсан олон улсын тэмцээнд зургийг нь илгээхээр шийдсэн байна. Уралдаанд хүүгийнх нь зураг түрүүлсэн талаарх мэдээг хатагтай Синду амьд байхдаа сонссон боловч шагнал авч байгааг нь харж чадалгүй нас баржээ.

14 настай Анужат “ээж маань миний хамгийн том дэмжигч байсан. Тэр үргэлж намайг өмнөхөөсөө илүү сайн зураг зурах урам зоригийг өгдөг байсан. Ээжийн маань сэтгэл, аавын маань дэмжлэг надад итгэл найдвар төрүүлдэг” хэмээн ярьжээ. Тэр дөрвөн настайгаасаа зураг зурж эхэлсэн бөгөөд ээж нь түүний авьяасыг хамгийн түрүүнд олж харжээ. Анужат эргэн тойрноо ажиглаж, төрсөн сэтгэгдлээ зургаараа илэрхийлэх дуртай ажээ.

Эх сурвалж: The Better India

---