Бүгд Найрамдах Өмнөд Судан улсад энхийг сахиулж буй цэргийн алба хаагчдын дунд коронавирусийн халдвар голомтлон тархлаа гэдэг харамсалтай мэдээлэл манай редакцид ирлээ.

Эх сурвалжийн мэдээлж буйгаар “Энхийг сахиулагчдаас авсан PCR шинжилгээгээр хоёр цэргийн шинжилгээний хариу нь "эерэг" гарсан бөгөөд сэжиг бүхий 20 гаруй алба хаагч шинжилгээний хариугаа хүлээж байгаа” аж.

Хамгийн ноцтой нь коронавирусийн халдвар авсан байж болзошгүй шалтгаанаар халуураад хэвтэж буй цэргүүдэд үзүүлж буй эмнэлгийн тусламж үйлчилгээ туйлын хангалтгүй, цэргийн алба хаагчдыг вакцинжуулах, тус халдвараас урьдчилан сэргийлэх ажлыг огт хийхгүй байгааг талаарх мэдээллийг энхийг сахиулагчдын ар гэрийнхнээс бидэнд мэдээллээ.

Энэхүү ноцтой асуудлыг Зэвсэгт хүчний жанжин штабын Ажиллагааны удирдлагын газрын дарга Бригадын генерал С.Дашзэгвээс тодруулахад “Энэ мэдээллийг хэн чамд өгсөн бэ. Энхийг сахиулагчдын дунд коронавирусийн халдвар тархсан зүйл огт байхгүй. Өмнөд Судан улсад хэдийгээр коронавирус тархаж байгаа боловч энхийг сахиулж буй цэргийн баазад уг халдвар огт бүртгэгдээгүй” хэмээн эрс няцаасан мэдээлэл өглөө.

НҮБ-ын мандаттай энхийг сахиулах ажиллагааны Х ээлжид Mонголын 850 гаруй цэргийн алба хаагч оролцож байгаа бөгөөд тус цэргийн баазад гарсан коронавирусийн халдварын тархалтын мэдээллийг чанд нууцлах зорилгоор цэргийн алба хаагчдын гар утсыг хураагаад байгаа талаар эх сурвалж хэлж байна.

---