Монгол улсын Шадар сайд С.Амарсайхан Төрийн ордонд вакцинжуулалт удаж байгаа шалтгаан болон Засгийн газраас баримталж буй бодлогыг танилцууллаа. "2021 оны 7 сар гэхэд насанд хүрсэн хоёр сая хүнээ вакцинд бүрэн хамруулна" хэмээн Шадар сайд хэлж байна. 

Монгол улсын Шадар сайд С.Амарсайхан: 

-Вакцинжуулах ажил удааширалтай байна гэж ярьж байгаа. Вакцин бол онцгой зүйл учир яарч сандарч хандах хэрэггүй. Хоёрдугаар сарын 23-нд вакцинжуулах ажил эхэлсэн. Одоогоор голомтод ажиллаж байгаа 15 000 хүн хамрагдаад байна. Сөрөг урвал гарч байгаа ч энэ нь зөвшөөрөгдөх хэмжээнд байна. 

Вакцинжуулах ажлыг хоёр үе шаттай хийнэ. Голомтлоод байгаа Улаанбаатар хотод 3,4 дүгээр сард, "ногоон бүс" болоод байгаа орон нутагт 5,6 дугаар сард явагдана. Сард дунджаар 500 мянган насанд хүрсэн иргэнд вакцин хийнэ. Долдугаар сарын 1 гэхэд насанд хүрсэн хоёр сая хүнээ бүрэн хамруулна. Хүний нөөц, санхүүжилт бүгд хангалттай бий. N1H1 халдвар дэгдсэн 2009 онд насанд хүрсэн иргэдээ арван хоногт вакцинжуулж байсан туршлага бидэнд бий. 

-Нийслэлийн сургууль, цэцэрлэг 4 сарын 1-нд нээгдэх үү? 

-Улаанбаатар хотод 45 000, орон нутагт 25 000 багш ажиллаж байна. Эхний ээлжинд вакцинд хамруулах хүмүүсийн тоонд багш нар орсон. Цаг үеийн нөхцөл байдлыг харгалзан үзэж дөрөвдүгээр сарын 1-нд нээх эсэхийг шийднэ. 

-Хувийн компаниуд вакцин оруулж ирэх асуудал юу болж байна вэ? 

-Уулзалтууд хийгдэж байна. Засгийн газраас хувийн компаниуд вакцин оруулж ирэхийг дэмжиж байгаа. Харин нэг бодлого баримталж байна. Төр вакциныг үнэ төлбөргүй хийнэ. Хувийн компаниуд үйлдвэрийн үнээр нийлүүлэхийг шаардаж байгаа. Тэд маань ч үүнийг ойлгон хүлээн авч "ямар нэгэн ашиг хонжоо харахгүйгээр нийгмийн хариуцлагаа биелүүлнэ" гэдгээ мэдэгдсэн. 

Одоо Монгол улсын Засгийн газар хуралдаж байна. Вакцинжуулах төлөвлөгөөгөө танилцуулж, батлуулна. 

---