Их Британи улс олон улсын хэмжээнд хүлээн зөвшөөрөгдсөн коронавирусийн вакцины паспортын системийг нэвтрүүлэн, дэлхийн аялал жуулчлалыг сэргээхээр төлөвлөж байна.

Тус улс нь дэлхийн эдийн засгийн тэргүүлэгч улсуудаас бүрдэх "Их долоо" бүлгийн удирдлагын байр сууриа ашиглан энэхүү стандартыг тогтоох зорилготой байгаа аж. Гэхдээ Ерөнхий сайд Борис Жонсон энэхүү санаа нь "ээдрээтэй" ёс зүйн асуудал үүсгэнэ гэдгийг хүлээн зөвшөөрсөн юм.

Их Британийн Засгийн газраас "Вакцин хийлгэсэн хүмүүсийг олон улсад илүү чөлөөтэй зорчих боломжийг олгох системийг нэвтрүүлэх талаар судлах болно" хэмээн мэдэгджээ. Түүнчлэн Дэлхийн эрүүл мэндийн байгууллага, "Их долоо" болон өөр төрлийн байгууллагуудаар дамжуулан бусад улс орнуудтай хамтран ажиллаж, иргэд ба аж үйлдвэрүүдийн тогтвортой байдлыг хангах стандарт бүхий олон улсын тогтолцоог бий болгох аж.

Засгийн газрын баримт бичигт үргэлжлүүлэн "Ийм системийг нэвтрүүлэхэд шударга байдал алдагдаж болохгүй бөгөөд хараахан вакцин хийлгээгүй, эсвэл хийлгэх боломжгүй хүмүүст учир дутагдалтай зүйл байх ёсгүй. Мөн энэхүү шийдлийг ойрын хугацаанд ашиглалтад оруулах боломжгүй гэж үзэж байна. Дэлхий даяар хэрэгжиж байгаа хязгаарлалт хэсэг хугацаанд үргэлжлэх төлөвтэй байгаа" гэж тэмдэглэжээ.

Ерөнхий сайд Жонсон энэ талаар шийдвэр гаргахаасаа өмнө судалж үзэх хэрэгтэй нарийн төвөгтэй асуудлууд байгаа гэдгийг өнгөрөгч мягмар гарагт мэдэгдсэн байна. Тэрээр "Бид ямар нэгэн шалтгаанаар вакцин хийлгэж чадахгүй байгаа хүмүүсийг ялгаварлан гадуурхаж болохгүй. Зарим хүмүүс эрүүл мэндийн шалтгааны улмаас вакцин хийлгэх боломжгүй байдаг. Эсвэл зүгээр л вакцин хийлгэхээс татгалзсан хүмүүс байх боломжтой" хэмээн онцолсон юм.

Эх сурвалж: Associated Press

---