Францын инээдмийн жүжигчин Жерар Депардье гурван жилийн өмнө 22 настай жүжигчин бүсгүйг хүчирхийлсэн хэрэгт холбогдоод байсан юм. Залуу бүсгүй удаа дараа гомдол гаргасныг Парисын прокурорууд хүлээж аваагүй байсан ч энэ удаад гомдлыг үндэслэлтэй гэж үзсэн учир жүжигчний эсрэг бэлгийн хүчирхийллийн хэрэг үйлдсэн эсэхийг шалгах албан ёсны мөрдлөгийг эхлүүллээ.

Энэ жил 73 настай нэрт жүжигчин Парис дахь орон сууцандаа жүжигчин бүсгүйг хоёр ч удаа хүчирхийлсэн гэж буруутгагдсан. Уг явдал 2018 оны наймдугаар сард болсон гэж бүсгүй гомдол мэдүүлжээ.

Депардьегийн өмгөөлөгч Херв Темимийн мэдэгдсэнээр жүжигчин өөрийнх нь эсрэг бүх хэргийг эрс үгүйсгэж байгаа бөгөөд хэргийн мөрдөн шалгах явцыг олон нийтэд мэдээлэхгүй байхыг хүссэн байна. Депардьег ямар нэгэн байдлаар хорьж саатуулаагүй  ч шүүхийн хяналтад байгаа ажээ.

Жерар Депардье нь 170 орчим кино бүтээлд дүрээ мөнхөлсөн бөгөөд 1990 онд Канны кино наадмаас шилдэг эрэгтэй жүжигчний шагнал хүртэж, мөн ондоо Оскарын наадамд шилдэг эрэгтэй жүжигчинд нэр дэвшиж байсан юм. Тэрээр 2013 онд ОХУ-ын иргэншилтэй болсон билээ.

Эх сурвалж: Vulture, BBC

---