Япон улсад амиа хорлолтын түвшин нэмэгдэж байгаатай холбогдуулан тус улсын иргэдийн ганцаардал, нийгмээс тусгаарлагдсан байдлыг бууруулах зорилгоор "Ганцаардлын сайд"-ыг томилжээ.

Ерөнхий сайд Ёшихидэ Суга Тэцуши Сакамотог "Ганцаардлын сайд"-аар томилон, ганцаардал, нийгмийн тусгаарлалттай тэмцэх Засгийн газрын бодлогыг хянах үүрэг өгсөн байна. Тэрээр энэ сарын сарын 12-нд хийсэн хэвлэлийн бага хурлын үеэрээ Сакамотод хандан "Эмэгтэйчүүд эрчүүдээс илүү тусгаарлагдмал байдалд өртөж, амиа хорлох хүмүүсийн тоо өсөх хандлагатай байна. Та асуудлыг тодорхойлон, цогц бодлогын арга хэмжээг авна гэж найдаж байна" гэж хэлжээ.

Тэцуши Сакамото нь үүнээс өмнө Японы буурч буй төрөлтийн түвшин болон бүс нутгийн сэргэлтийн асуудал эрхэлсэн сайд байсан юм.

Цар тахлаас болж 2020 онд хүмүүс урьд өмнөөсөө илүүтэйгээр нийгмээс тусгаарлагдсан бөгөөд Японд сүүлийн 11 жилд анх удаа амиа хорлолтын түвшин өссөн байна. Судалгаанаас харахад ганцаардал нь зүрх судасны өвчин, сэтгэцийн олдмол өвчин, хооллох зуршлын эмгэг зэрэг эрүүл мэндийн асуудалд ихээр нөлөөлдөг аж.

Японы шинэ Ганцаардлын сайд энэ хоёрдугаар сарын сүүлээр яаралтай форум зохион байгуулж, ганцаардал, тусгаарлалттай холбоотой иргэдийн санаа бодлыг сонсохоор төлөвлөж байгаагаа зарлажээ. Тэрээр "Би нийгэм дэх ганцаардал, тусгаарлалтаас урьдчилан сэргийлэх, хүмүүсийн хоорондын харилцаа холбоог хамгаалах чиглэлээр үйл ажиллагаа явуулах болно" хэмээн мэдэгдсэн байна.

Сонирхуулахад, Их Британи нь Ганцаардлын сайд томилсон дэлхийн анхны улс юм. 2017 онд хийсэн судалгаагаар тус улсын есөн сая гаруй хүн ихэнхдээ эсвэл үргэлж ганцаарддаг гэдэг нь тогтоогдсон тул 2018 онд Ганцаардлын сайдыг томилсон байна. Австрали улсын эрх баригчид мөн үүнтэй ижил төстэй албан тушаал бий болгох талаар бодолцож үзэж байгаа аж.

Эх сурвалж: Insider

---