Биатлоны насанд хүрэгчдийн дэлхийн аварга шалгаруулах тэмцээн дуулиан шуугиантай явагдаж өндөрлөлөө.
Энэ удаагийн ДАШТ-д нийт 37 орон өрсөлдсөнөөс багийн дүнгээр Норвегийн баг тамирчид долоон алт, гурван мөнгө, дөрвөн хүрэл медаль хүртсэнээр хол тасархай тэргүүллээ.
Хоёр буюу түүнээс олон медаль хүртсэн 11 тамирчин төрөн гарсан ба үүний зургаан тамирчин нь Норвеги тамирчин байлаа. Тодруулбал дөрвөн алт, нэг мөнгө, нэг хүрэл медаль хүртэж бүх тамирчдын тэргүүн эгнээнд Норвегийн Тирил Экхофф орсон бол мөн Норвегийн Стурла Холм Легрейд дөрвөн алтан медаль хүртэн удаалсан байна.
ДАШТ-ий сүүлийн өдөр эмэгтэй 12.5км, эрэгтэйчүүдийн 15км зайн бөөн гараа төрөл явагдсан ба эрэгтэй, эмэгтэй хоёр төрлийн нийт зургаан медалийн дөрвийг нь Норвеги тамирчид хүртлээ.
Биатлоны спорт сонирхогчдыг энэ сарын 27-ны өдөр эхлэх залуучуудын ДАШТ хүлээж байна. Манай сайт уламжлал ёсоор тус тэмцээнийг шууд дамжуулан үзүүлэхээс гадна мэдээ, мэдээллийг нь цаг алдалгүй шуурхай хүргэхээр ажиллаж буйгаа дуулгахад таатай байна.
