Улсын онцгой комиссын ээлжит хуралдаан болж, хоёрдугаар сарын 23-аас хойш улс орон даяар ямар дүрэм журам мөрдөх талаар танилцууллаа. 

Шадар сайд, УОК-ын дарга С.Амарсайхан: "Гадаадад ажиллаж, амьдарч байгаа иргэдээ татан авахтай холбоотой ажлууд зохион байгуулагдаж байна. 03, 04 дүгээр сард 12-14 нислэгээр, үе шаттайгаар татаж авна. Ирж байгаа иргэддээ тусгаарлах байрны гурван төрлийн сонголтыг бий болгож байгаа. Ингэснээр иргэд өөрсдөө ямар төрлийн тусгаарлах байранд, ямар орчинд байх вэ гэдгээ сонгох боломжтой болно. 

Мөн гадаадаас ирсэн иргэдийг 10-14 хоног тусгаарлана. Мутацид орсон вирусийн бүсээс ирсэн иргэд 14 хоног тусгаарлагдах бол бусад харьцангуй аюулгүй орчноос ирсэн иргэдийг 10 хоног тусгаарлана. Цаашдаа гэрээр тусгаарлаж, цахим эмчилгээ, цахим зөвлөгөө өгөхөөр бэлтгэл ажлууд хийгдэж байгаа.

ДЭМБ-аас хүлээн зөвшөөрсөн вакциныг хийлгэсэн гадаадын болон дотоодын иргэдийн гар утсанд тусгай аппликейшн суулгаж өгнө. Гэрийн тусгаарлалтад байгаа иргэдийг цахим технологиор хянаж, зөвлөгөө өгөх юм.

Иргэдээ татаж авахдаа 250 болон түүнээс дээш суудалтай онгоц, агаарын тээврийн шийдлүүдийг ашиглах болно. Хэдийгээр нислэгийн тоог нэмэгдүүлж байгаа ч онгоцны хэмжээ, суудлаас шалтгаалаад иргэдээ олноор нь авчрах боломжгүй байгаа. Тиймээс аль болох том онгоцыг нисгэн, олон тооны нислэг үйлдэхээр бэлтгэж байна.

Энэ хүрээнд мөн иргэддээ тодорхой хувиар тийзийн хөнгөлөлт үзүүлэх ажлыг давхар зохион байгуулж байгаа. Тодруулбал, 10 хүртэлх хувийн хөнгөлөлтийг үзүүлэх болно" гэв.

---