Коронавирусийн нөхцөл байдлын талаарх /2021.02.20/11:00 цагийн ээлжит мэдээллийн үеэр коронавирусийн эсрэг вакцинжуулалтын асуудлыг тодрууллаа.

ХӨСҮТ-ийн Дархлаажуулалтын албаны дарга О.Дашпагма: "Эсрэг биет үүссэн буюу коронавирусээр өвчилсөн хүмүүсийг эдгэрснээс нь хойш 90 хоногийн дараа дархлаажуулах боломжтой. 90 хоног хүртэлх хугацаанд вакцин хийлгэхгүй байхыг зөвлөж байгаа. 

Иргэдийг хоёр тунгаар вакцинжуулна. Вакцинуудыг заасан журмын дагуу, цаг хугацаанд нь хийлгэх шаардлагатай. Их Британи улсад хийсэн судалгаагаар "AstraZeneca" вакциныг хийсний дараа хэсэг газрын урвал илэрсэн талаарх мэдээллүүд бүртгэгдсэн. Тодруулбал, мянган тун вакциныг тарих явцад 3-4 тохиолдолд хэсэг газрын урвал илэрсэн байна. Энэ нь бусад вакцинтай харьцуулахад вакцины дараа илэрч болох хэсэг газрын урвал энгийн түвшинд байна гэсэн үг.

Вакцин хийсний дараа тодорхой хугацаанд мөрдөгдөх зүйлүүд байгаа. Манайх эрс тэс уур амьсгалтай учир вакцин тариулсны дараа цаг агаартаа тохируулж хувцаслахыг зөвлөдөг. Мөн вакцин хийлгэснээс 1-2 хоногийн дараа илрэх хариу урвалыг ажиглаж, тохирсон арга хэмжээнүүдийг авах хэрэгтэй. Бидний хэрэглэх вакцин дээр архи, тамхи хэрэглэхгүй байх хэрэгтэй гэсэн заалт байхгүй.

"AstraZeneca" вакциныг 0.5 мл нэг удаагийн тариураар хийдэг. Бидэнд эхний ээлжийн вакциныг тарихад шаардлагатай зориулалтын тариур нөөцөд байгаа. Мөн цаашид шаардлагатай тариурыг захиалсан байгаа.

Түүнчлэн одоогоор Монгол Улсад мутацид орсон вирус бүртгэгдээгүй байгаа тул эдгээр вакцин коронавирусийн эсрэг бүрэн үйлчилнэ гэсэн үг. "Ковид-19"-ийн эсрэг вакцинуудын судалгаагаар хамгийн багадаа зургаан сарын дархлаа тогтооно гэсэн үр дүн гарсан хэдий ч вакцин нийтийн хэрэглээнд гарсны дараа яг тодорхой болно" гэв.

---