Коронавирусийн нөхцөл байдлын талаарх 11:00 цагийн ээлжит мэдээллийн үеэр ЗГХЭГ-ын ХМХХ-ийн дарга Ц.Ганзориг коронавирусийн эсрэг вакцинжуулалтын ажлын явцыг танилцуулав.

ЗГХЭГ-ын ХМХХ-ийн дарга Ц.Ганзориг: "Яг одоо Монгол Улсын Ерөнхий сайд манай улсад вакцин нийлүүлэх дөрвөн улсын Элчин сайдтай ээлж дараалан уулзалт хийж байна. Вакцины эхний татан авалтын энэ долоо хоногийн сүүлээр хийхээр төлөвлөж байгаа. Мэдээж галын шугам дээр ажиллаж байгаа эмч, эмнэлгийн ажилтнууд, хөл хориог сахиулж байгаа цагдаа хүчний байгууллагын ажилтнууд, өндөр настай иргэд болон суурь өвчинтэй иргэд гэх мэтчилэн дараалалтай хуваарийг гаргасан байна.

Мөн вакцинжуулт хийх эмч, эмнэлгийн ажилтнуудын сургалтыг Энэтхэг, Монгол Улс хамтран явуулж байгаа. Нийт 150 эмнэлгийн ажилтан сургалтдаа хамрагдаад бараг дууссан.

Англи улсын Элчин сайдын яамнаас цагийн өмнө "AstraZeneca" вакцины талаар албан ёсны мэдээлэл өгсөн байна. Тус вакциныг ДЭМБ-ын зүгээс зөвшөөрсөн бөгөөд ингэснээр "Ковакс" хөтөлбөрийн хүрээнд дэлхий нийтэд тэгш хүртээмжтэйгээр хүртээх ажлыг эхлүүлж болно гэсэн зөвшөөрлийг олгосон гэсэн үг. Тэгэхээр Монгол Улсад орж ирэх "AstraZeneca" вакцин ДЭМБ-ын албан ёсны зөвшөөрөлтэй гэсэн үг.

Түүнчлэн ОХУ, БНХАУ улсуудтай яриа хэлэлцээр хийн, вакцин татах бэлтгэлийг хийж байна. Энэтхэг улсаас татах вакцин бол "AstraZeneca"-гийн "Covishield" вакцин бөгөөд мөн ХБНГУ, АНУ-ын хамтарсан "Pfizer" вакциныг авна. Эдгээр нь бүгд дэлхий хэмжээнд, онол практикийн хувьд үр дүнгээ гаргаад явж байгаа вакцинууд. Ингээд бид эдгээр вакциныг шат дараалалтайгаар нийлүүлээд, иргэн танд аль вакциныг хийлгэх вэ гэдэг сонголтыг үлдээх болно" гэсэн юм.

---