Улсын онцгой комиссоос гаргасан чиглэлийн хүрээнд өнгөрсөн 24 цагт хийсэн шинжилгээний хариуг танилцууллаа.

ХӨСҮТ-ийн Тандалт судалгааны албаны дарга Д.Амбасэлмаа: "Өнгөрсөн 24 цагт нийт 37,530 хүнд шинжилгээ хийснээс 33 хүнээс шинээр халдвар илэрсэн. Үүний 24 нь батлагдсан тохиолдлуудын ойрын хавьтлын анхан болон давтан шинжилгээнээс илэрсэн бол есөн тохиолдол нь "Нэг хаалга-Нэг шинжилгээ" ажлын явцад илэрсэн байна.

Улаанбаатар хотод коронавирусийн батлагдсан тохиолдол нийтдээ 1,578 болсон. Орон нутгаас нэмж халдвар илрээгүй. Өнөөдрийн байдлаар 643 хүн эмчлэгдэж байгаа бөгөөд биеийн байдлын хувьд 556 хүн хөнгөн, 77 хүн хүндэвтэр, 3 хүн хүнд, хоёр хүн маш хүнд байна.

"Нэг хаалга-нэг шинжилгээ" арга хэмжээний хүрээнд бүртгэгдсэн нийт 26 тохиолдлыг задалж үзвэл БГД-ийн 3,12,25-р хороо, БЗД-ийн 26-р хороо, СБД-ийн 18-р хороо, СХД-ийн 7,39-р хороо, ХУД-ийн 2, 4-р хороо, ЧД-ийн 2,6,12-р хорооноос тус тус илэрсэн" гэв.

ЗГХЭГ-ын ХМХХ- ийн дарга Ц.Ганзориг: "Өнөөдөр СХД-ийн 24,261 өрхийн нэг гишүүнийг шинжилгээнд хамруулна. Суурин 18 цэг, явуулын 50 багаар зохион байгуулна. 

Өнөөдөр мөн нэр бүхий 24 хүнсний бөөний төв үйл ажиллагаагаа эхэлж байгаа. Одоогоор хөл хориог 96-98 хувьтай хийж, 2-5 хувийг хөдөлгөөнд оролцуулж, үр дүнтэй хязгаарлалт хийж байна. Таван хоногийн хугацаанд "Нэг хаалга-Нэг шинжилгээ" арга хэмжээний хүрээнд 26 хүнээс халдвар илэрлээ. Ингээд бид 12 хоногт нийт 411,000 орчим өрхөөс шинжилгээ авч, олон нийтийн дунд халдвар ямар байгааг тандан тогтоох болно. 

Эмнэлгийн үйлчилгээ авах гэж байгаа, орон нутаг руу зайлшгүй явах шаардлагатай иргэд дурын цэгтээ очоод "PCR" шинжилгээ өгөх боломжтой. Өнөөдрөөс бүх дүүргийн эрүүл мэндийн төв, өрхийн эмнэлгүүд хэвийн ажиллаж байгаа. Мөн өчигдрөөс нийтийн тээврийн автобусны хүрэлцээг нэмсэн.

"Нэг хаалга-Нэг шинжилгээ" арга хэмжээний зардал 10 орчим тэрбум төгрөг гэж хэлж болно. Үүнд нэг удаагийн хувцас хэрэглэлээс авхуулаад лаборатори, сорьц гээд бүх зардал шингэсэн. Энэ бол жилийн хугацаанд нөөцөө бэлтгэсний хүрээнд явуулж байгаа ажил хэдий ч бүх нөөцөө шавхаж байна гэсэн үг биш" хэмээв.

---