Францын гэлэнмаа Люсил Рандон тун удахгүй 117 насыг зооглох бөгөөд тэрээр Европ тивийн хамгийн ахмад настай иргэн юм. 117 насныхаа босгон дээр Ковид-19 коронавирусийн халдвар авч, эдгэсэн байна. Өнгөрөгч нэгдүгээр сарын 16-ны өдөр коронавирусийн шинжилгээний хариу нь эерэг гарсан бөгөөд халдварын ямар нэг шинж тэмдэг илрээгүй ажээ.

Европын хамгийн ахмад настан Тоулоны ахмадуудын асаргааны газарт амьдардаг бөгөөд түүнийг халдвар авсныг илрүүлсний дараа тусгаарласан байна. Одоо түүнийг бүрэн эдгэсэн гэж үзжээ. Люсил Рандоныг Андре эгч хэмээн авгайлдаг ба хараагүй болж тэргэнцэр ашигладаг байна. Маргааш төрсөн өдөр нь тохиосноор 117 нас хүрэх ажээ.

Ахмад настай хүмүүс коронавирусийн халдвараар нас барах тохиолдол их байгаа ч Андре эгч эсэн мэнд эдгэсэн нь тун азтай тохиолдол гэж асаргааны газрын төлөөлөгч Дэвид Тавелла хэлжээ. Андре эгч халдвар авсныхаа дараа эрүүл мэндийнхээ талаар асуухын оронд идэх хоол, унтах цагийн хуваарьтаа өөрчлөлт оруулах шаардлагатай эсэхийг лавласан байна.

Люсил Рандон 1904 онд төржээ. Тэрээр дэлхий дээр хамгийн удаан амьдарч байгаа хоёр дахь хүн юм.

Эх сурвалж: ВВС

---