ОХУ-ын иргэд энэ оны наймдугаар сар гэхэд амны хаалт зайлшгүй зүүх шаардлагагүй болж магадгүй гэж тус улсын Ерөнхийлөгчийн хэвлэлийн төлөөлөгч Дмитрий Песков мэдэгджээ.

Оросын Хэрэглэгчийн эрхийг хамгаалагч "Роспотребнадзор" байгууллагын Халдварт өвчин судалгааны төв хүрээлэнгийн орлогч дарга Наталья Пшеничная мөн эрх баригчид коронавирусийн цар тахлаас урьдчилан сэргийлэх арга хэмжээг үргэлжлүүлэн авснаар иргэд 2021 онд олон нийтийн газар амны хаалт зүүх шаардлагагүй болно гэж мэдэгдсэн байна.

Тэрээр "Санаа амрах цаг болоогүй. Цар тахлын эсрэг урьдчилан сэргийлэх бүх арга хэмжээг заавал дагаж мөрдөх ёстой. Тэгсэн тохиолдолд бид зайлшгүй амны хаалт зүүх дүрэм журмыг цуцлах боломжтой. Энэ нь биднээс л хамаарна" хэмээн өнгөрөгч даваа гарагт "ТАСС" агентлагт ярьжээ. Түүний таамаглаж байгаагаар тус улсын хүн амын 60-70 хувь нь коронавирусийн эсрэг дархлаатай болсон үед халдварын тархалт зогсох аж.

Эх сурвалж: TASS

---