АНУ-ын Флорида мужийн Олдсмар хотын ус хангамжийн системд үл таних этгээд зөвшөөрөлгүй нэвтэрч, оршин суугчдын ундны усны эх үүсвэрийг хордуулахыг оролдсон тохиолдол гарчээ.

Хакер усны системд нэвтэрч натрийн гидроксид буюу үнсэн шүлтийн хэмжээг онц аюултай түвшинд нэмэгдүүлэн, ундны ус руу цутгахыг оролдсон байна. Азаар цэвэр усны хангамж хариуцдаг ажилтнуудын нэг уг үйлдлийг илрүүлж, буцаажээ.

Натрийн гидроксид буюу үнсэн шүлтийг усны хүчиллэг байдлыг хянахын тулд маш бага хэмжээтэйгээр ашигладаг байна. Харин хэмжээ нь ихэдвэл маш том аюул учруулна гэжээ. Тухайлбал усанд зэв ихсэх ба хүний арьс, нүдийг гэмтээх, үс унагах зэрэг эрсдэлүүдийг үүсгэдэг байна. Цаашлаад ам, хоолой, ходоодыг гэмтээж бөөлжих, суулгах шинж тэмдэг илэрдэг ажээ.

Одоогоор хакерыг илрүүлж баривчлан саатуулаагүй байна. Мөн хотын усны компьютерын программын системд зөвшөөрөлгүй нэвтэрсэн этгээд нь АНУ-ын нутаг дэвсгэрээс үү, гадны улс орноос халдсан уу гэдгийг тогтоогоогүй байна.

Эх сурвалж: ВВС

---