Өмнөд Солонгосын нийслэл Сөүл хотын захиргаа гэрийн тэжээвэр муур, нохдоос коронавирусийн халдварын шинж тэмдэг илэрвэл шинжилгээнд хамруулна гэж өнөөдөр мэдэгдэв.

Энэхүү шийдвэр гарахаас хэдэн долоо хоногийн өмнө тус улсын зүүн өмнөд нутгийн Жинжү хотын гэрийн тэжээвэр муурт халдвар илэрч, ийм төрлийн анхны тохиолдол бүртгэгдсэн. Сөүлийн Халдварт өвчинтэй тэмцэх албаны ажилтан Пак Юу-мигийн хэлснээр шинжилгээг тэжээвэр амьтны амьдардаг газрын ойролцоо авах бөгөөд малын эмч зэрэг эрүүл мэндийн ажилтнуудын баг ажиллах аж.

Мөн зөвхөн халуурах, ханиалгах, амьсгалахад бэрхшээлтэй болох, нүд, хамраас нь ялгарах шүүрэл нэмэгдэх зэрэг шинж тэмдэг илэрсэн муур, нохдоос л шинжилгээ авах гэнэ. Гэрийн тэжээвэр амьтдын шинжилгээ "Эерэг" гарсан тохиолдолд тэднийг 14 хоногийн турш гэрийн тусгаарлалтад оруулах бөгөөд халдвар амьтдаас хүнд дамждаг гэх нотолгоо одоогоор байхгүй тул тэднийг тусгаарлах байгууламж руу илгээх шаардлагагүй аж.

Хэрэв гэрийн тэжээвэр амьтдын эзэд коронавирусээр өвчлөн эмнэлэгт хэвтсэн, суурь өвчтэй эсвэл өндөр настайн улмаас тэднийг асран халамжлах боломжгүй бол амьтдыг Сөүл хотод байрлах тусгай байгууламжид тусгаарлахаар авч явах байна.

Эх сурвалж: Yonhap News Agency

---