АН-ын дарга С.Эрдэнэ, АН-ын ХЭГ-ын дарга Н.Цэрэнбат нар мэдээлэл хийлээ. 

АН-ын дарга С.Эрдэнэ: 

-Ардчилсан намын даргын шийдвэр гарлаа. АН-ын Х их хурлыг 2021 оны тавдугаар сарын 2-нд хийхээр тогтов. АН-ын даргын батламжлах, Ерөнхийлөгчийн сонгуульд нэр дэвшигчийг батламжлах болон бусад гэсэн асуудлуудыг хэлэлцэнэ. 

АН-ын даргын сунгаа Цагаан сарын дараа зарлагдана. АН-ын 200 000 гишүүн саналын эрхтэйгээр оролцоно. Цар тахалтай байгаатай холбоотойгоор намын анхан шатны гишүүдийн татварыг нэг жилээр тэглэсэн. 

-Ардчилсан нам хоёр хуваагдсанд дүгнэлт хийвэл...?

-АН хуваагдаагүй. Нэг удирдлага, нэг зохион байгуулалттайгаар ажиллаж байгаа. УДШ-ийн цахим бүртгэлд АН-ын даргаар С.Эрдэнэ миний бие хэвээр байгаа. Бүртгэл дээр миний нэр бас байгаа. Надад албан ёсны тамга, тэмдэг нь байна. Нам хагарсан юм шиг ойлголтыг нийгэмд өгөхийг хичээж байгаа хүмүүсийн үйл ажиллагаанд автах албагүй. Намын чиг үүрэгтэй хамтран ажиллаагүй хүмүүст хариуцлага тооцно. 

-АН-ын ҮБХ өчигдөр хуралдсан байсан?

-АН-ын Үндэсний бодлогын хороо /ҮБХ/-г хуралдуулах шийдвэр хаана ч гараагүй. АН-ын Улс төрийн зөвлөлийн бүрэн эрх дуусгавар болсон. ҮБХ-ны гишүүн гэх 10-20 хүн өчигдөр хуралдах гэж оролдсон. Улмаар цахимаар 60 орчим хүн хуралдана лээ. Эд бол ҮБХ-нд байсан хүмүүс. Бид бичлэгийг нь баримтжуулж авсан. 

АН-ын ХЭГ-ын дарга Н.Цэрэнбат: 

-АН-ын ҮБХ 410 гишүүнтэй. Анхан шатнаас бусад гишүүд энэ сарын 15-нд татвараа төлж дуусах ёстой. ҮБХ-ны 219 гишүүн татвараа төлсөн. Татвараа төлөөгүй 175 гишүүнийг нэг жилийн хугацаатайгаар түдгэлзүүлсэн. Өнөөдөр ҮБХ хуралдана. 

---