ОХУ-ын шүүх мягмар гарагт хуралдаж сөрөг хүчний удирдагч, Кремлийг хурцаар шүүмжлэгч Алексей Навальныйд гурван жил хагасын хорих ял оноолоо. Түүнд шүүх 2014 онд тэнсэн харгалзах ял оноосон бөгөөд түүнийг тэнсэн харгалзах ялын нөхцөлийг зөрчсөн гэж үзсэн байна.

Навальныйд хорих ял оноосны дараа мягмар гарагт томоохон хотуудад эсэргүүцлийн жагсаал цуглаан болсон. Москва хотын төвд олон зуун иргэн цуглаж эсэргүүцэл үзүүлсэн ба хэв журам сахиулах цагдаа нартай мөргөлдсөн байна. Цахим сүлжээнд тарсан бичлэг дээр цагдаа нар жагсагчдыг бороохойгоор зодож, баривчилгаа явуулсан байна.

ОХУ-д коронавирусийн хорио цээрийн дэглэм хэрэгжиж байгаа тул олон нийтийн цугларалт, жагсаал цуглааныг хууль бус гэж үзэж байгаа.

Москва хотод хэв журам сахиулах цагдаа нар 1,116 жагсагчийг баривчилсан бол Санкт-Петебургэд 246, бусад хотуудад 15 хүн баривчилсан гэж OVD-Info хүний эрхийн байгууллагаас мэдээлжээ.

Өнгөрсөн таван сарын хугацаанд Новичокт хордож Берлин хотод эмчлүүлж байгаад ирсэн сөрөг хүчний удирдагчийг нисэх буудал дээрээс баривчлан саатуулсан юм. Түүнийг баривчлагдсаны дараа дэмжигчид нь хоёр долоо хоногийн хугацаанд жагсаал хийн эсэргүүцсээр байна.

Эх сурвалж: ВВС

---