Японы Айчи мужийн Тоёота хотын дарга Тошихико Отаг хөнөөсөн хүнд 100 сая иен буюу 2.7 тэрбум гаруй төгрөг санал болгосон нийтлэлийг олон нийтийн сүлжээн дээр байрлуулсан 30 настай эрэгтэйг орон нутгийн цагдаа нар баривчилжээ.

Цагдаагийн газрын мэдээлснээр сэжигтэн нь 2020 оны хоёрдугаар сард Тоёота хотын даргын сонгуульд Отагийн эсрэг өрсөлдөөд, ялагдсан Шиня Ямаучи гэгч компанийн ажилтан эрэгтэй байсан аж. Тэрээр өнгөрөгч бямба гарагийн шөнө ямар нэг төрлийн иртэй зэвсэг барин, 66 настай хотын дарга Тошихико Отагийн оршин суудаг газрын чулуун хаалган дээр зогсож буй зургаа өөрийн олон нийтийн сүлжээндээ тавьсан байна. Уг зурагтай хамт мөн овоолсон бэлэн мөнгөний зургийг оруулсан байжээ.

Ямаүчи эдгээр зургийн дээр "Хотын даргыг хөнөөсөн хүнд 100 сая иен өгнө" хэмээн бичээд, ялангуяа коронавирусийн улмаас санхүүгийн хүндрэлд ороод байгаа хүмүүст энэхүү шагналыг санал болгож байгаагаа онцолжээ. Уг нийтлэлийг харсан Хотын захиргааны ажилтан цагдаад мэдэгдсэн аж.

Албаныхны хэлснээр Шиня Ямаучи хэргээ хүлээсэн бөгөөд энэ сарын 25-28-ны хооронд өдөр бүр хотын даргын оффист очсон хэдий ч түүнтэй уулзаж чадаагүй тул бухимдсандаа ийм үйлдэл хийсэн гэж мэдүүлсэн байна. Тэрээр мөн өөрт нь 100 сая иен байхгүй гэдгээ хүлээн зөвшөөрчээ.

Эх сурвалж: Japan Today

---