ОХУ-ын нийслэл Москва болон Санкт-Петербург, Новосибирск, Якутск зэрэг 90 орчим хотод сөрөг хүчний тэмцэгч Алексей Навальныйг суллахыг шаардаж олон мянган иргэн албан ёсны зөвшөөрөлгүй жагсаал зохион байгуулжээ.

Москва хотод цагдаа нар метроны буудлууд, төвийн хэсгүүдийн замыг хаасан байна. Өнгөрсөн амралтын өдөр болсон жагсаалын үеэр 5,000 гаруй иргэнийг баривчлан саатуулжээ.

Сөрөг хүчний удирдагч Алексей Навальныйг өнгөрсөн намар хордуулсан бөгөөд тэрээр Берлиний эмнэлэгт хэвтэн эмчлүүлж байгаад таван сарын дараа эх орондоо эргэн ирсэн ч нисэх буудал дээрээс баривчилсан юм. Үүний дараа Навальныйг дэмжигчид хоёр дахь долоо хоногтоо дараалан эсэргүүцлийн жагсаал хийлээ.

Түүний баривчилгааг хууль бус гэж үзэж байгаа бөгөөд өнгөрсөн намар Новичокоор хордуулсан хэргийг Оросын Засгийн газар зохион байгуулсан гэж буруутгасаар байгаа юм.

ВВС агентлагийн Москва дахь сурвалжлагч Сара Рэйнсфордын хэлснээр жагсагчид болон цагдаа нар муур хулгана болон хөөцөлджээ. Жагсаалд оролцогчид Навальныйгийн саатуулагдаж байгаа Матросскаяа Тишина хорих газарт хүрэхийг оролдсон байна.

Харин цагдаа нарын зүгээс коронавируст цар тахалтай холбогдуулаад хөл хорио, хорио цээрийн хатуу дэглэм баримталсан тул олон нийтийн цугларалт, жагсаал цуглааныг хууль бус гэж үзэн тараахыг оролджээ.

Эх сурвалж: ВВС

---