Индонезийн Ачех мужид ижил хүйстнээ сонирхдог хоёр эрэгтэйг олон нийтийн өмнө тус бүр 77 удаа саваа модоор ташуурдаж шийтгэжээ. Мужийн нийслэл Банда Ачех хотод дундад зууны үеийн ял шийтгэлийг гүйцэтгэхэд олон арван иргэн цуглаж харсан ба энэ явдлыг олон улсын хүний эрхийн байгууллагууд хурцаар шүүмжлэн буруутгасан байна.

Ачех мужийн эрх баригчид ижил хүйстнээ сонирхогчдыг олон нийтийн өмнө саваадаж шийтгэж буй гурав дахь тохиолдол нь болжээ. Тус муж 2001 оноос хойш автономит эрхтэй болж, исламын шариатын хуулийг хэрэгжүүлэх эрхтэй болсон.

Үүнээс гадна тус мужид гэр бүлээс гадуур харилцаа тогтоосон дөрвөн эрэгтэйг 17 удаа, согтууруулах ундаа хэрэглэсэн хүмүүсийг 40 удаа саваагаар ташуурдах шийтгэл оноосон байна. Мөн мөрийтэй тоглосон иргэд болоод хэт нимгэн хувцасласан эмэгтэйчүүдэд олон нийтийн өмнө саваадах шийтгэл оноодог ажээ.

Эх сурвалж: The Guardian

---