БНХАУ Тайваний тусгаар тогтнолын асуудал дээр байр сууриа хурцаар илэрхийллээ. Тайваньчуудын тусгаар тогтнол бол Бээжинд “дайн” зарласан үйлдэл гэдгийг хатуу анхааруулжээ.

Уг мэдэгдлээс өмнө Бээжин цэрэг армийн ажиллагаагаа идэвхжүүлсэн ба Тайваний ойролцоо дайн тулааны зориулалттай нисэх онгоцуудыг илгээгээд байна. Өнгөрсөн долоо хоногт АНУ-ын шинэ Ерөнхийлөгч Жо Байден тангараг өргөж, ажлаа хүлээж авсантай холбогдуулан Америк-Тайваний харилцаа илүү гүнзгийрч байгаатай зэрэгцэн Бээжин сэрэмжлүүлэг өгч байгаа үйлдэл гэж ажиглагчид таамаглаж байгаа юм.

АНУ-ын шинээр сонгогдсон эрх баригчид Тайваний батлан хамгаалах чадамжийг Вашингтон дэмжинэ гэдгийг бататган мэдэгдэл хийсэн. Үүний хариуд Хятадын Батлан хамгаалахын төлөөлөгч Ву Чиан пүрэв гарагт болсон хэвлэлийн хурал дээр “Тайваний тусгаар тогтнолыг дэмжих хүчинд анхааруулж хэлэхэд галаар наадвал өөрсдийгөө шатаах болно. Тайваний тусгаар тогтнол бол дайны эхлэл” гэжээ.

Тайвань өөрсдийгөө тусгаар тогтносон улс гэж үздэг боловч Хятадын Засгийн газар өөрийн муж гэж үздэг аюулгүй байдлын эмзэг сэдэв юм.

Эх сурвалж: ВВС

---