Пакистаны Дээд шүүхээс Америкийн сэтгүүлч Даниэл Перлийг барьцаалан, хөнөөсөн дөрвөн хүнийг суллах шийдвэр гаргасан бөгөөд Цагаан ордноос уг үйлдлийг "Дэлхийн бүх терроризмын хохирогчийг доромжилсон явдал" хэмээн буруушаажээ.

Даниэл Перл 2002 онд "The Wall Street Journal" сонины Өмнөд Ази дахь хэлтсийн даргаар ажиллаж байхдаа Пакистаны өмнөд хэсэгт орших Карачи хотод барьцаалагдаж байсан билээ. Тухайн үед уг хэрэг олон улсын анхаарлын төвд байсан. Хожим нь халдагчид Перлийн толгойг тасдаж байгаа бичлэгээ АНУ-ын эрх баригч нарт илгээсэн юм. Энэ нь хэт даврагчдын бүтээсэн анхны суртал ухуулгын бичлэгүүдийн нэг байсан бөгөөд бусад террорист бүлгүүдэд үүнтэй адил аймшигт үйлдлүүдээ дүрсжүүлэх санааг өгсөн.

Дөрвөн сэжигтнийг 2002 онд баривчилж, Перлийг барьцаалж, амийг нь хөнөөсөн хэргээр ялласан байна. Харин Их Британийн иргэн Ахмед Омар Саид Шейхэд цаазаар авах ял оноожээ. Гэвч өнгөрсөн оны дөрөвдүгээр сард тухайн үеийн хэргийн мөрдөн байцаагчид хууль ёсны байцаалтын журам мөрдөөгүй нь тогтоогдсон тул Карачигийн Синдх мужийн дээд шүүх хэргийг дахин хянан хэлэлцсэн юм.

Ингээд Синдхийн дээд шүүхээс хэргийн нотлох баримт хангалтгүй, цагдаагийн мэдэгдлүүд хоорондоо таараагүй бөгөөд сэжигтнүүдийн бурууг албадан хүлээлгэсэн гэж үзэн, хэрэгт буруутгагдаж байсан дөрвөн хүний холбогдох ял шийтгэлийг хүчингүй болгох шийдвэр гаргажээ. Шүүхээс мөн "Эдгээр хүмүүс сүүлийн 18 жилийг торны цаана өнгөрөөж, нөхөж баршгүй хор хөнөөл, туйлын ялгаварлан гадуурхалд өртсөн" хэмээн тэмдэглээд, тэднийг арванхоёрдугаар сард суллахыг тушаасан байна.

Тэгвэл АНУ-ын Төрийн нарийн бичгийн дарга Антони Блинкен "Пакистаны Засгийн газар шударга ёсыг тогтоохын тулд хууль эрх зүйн хувилбаруудаа түргэн шуурхай авч үзнэ гэж бид найдаж байна" хэмээн албан ёсны мэдэгдэл хийжээ. Даниэл Перлийн аав Жюдеа Перл "CNN" агентлагт өгсөн ярилцлагадаа энэхүү шийдвэрийг "Хүн төрөлхтний эсрэг, сэтгүүлзүйн эсрэг, манай соёл иргэншлийн эсрэг гэмт хэрэг" гэж тодорхойлсон бөгөөд түүний гэр бүлийн гишүүд бүгд Цочролд орон, бүрэн итгэж чадахгүй байгаа" гэжээ.

Эх сурвалж: CNN

---