Covid-19-ийн тархалтыг богино хугацаанд дарж, ногоон бүс болсноо зарлаж, улмаар бүх үйл ажиллагааг хэвийн явуулж байсан Дархан-Уул аймагт дахин халдвар гарсантай холбоотойгоор фитнесс төвүүд болон зарим газруудын үйл ажиллагааг хязгаарлаад байна.

Дархан-Уул аймагт энэ сарын 26-27-ны шөнө Улаанбаатар Дархан чиглэлийн хүнс тээврийн жолоочийн PCR шинжилгээний хариу нь 48 цагаас хэтэрсэн байсан тул дахиж шинжилгээнд хамруулсан юм. Харамсалтай нь шинжилгээгээр тухайн жолоочоос Covid-19 илэрсэн. Түүнийг ахтайгаа цуг нэгдүгээр сарын 26-ны өдөр шинжилгээний хариу гартал гэртээ тусгаарлагдаарай гэсэн боловч 18:00-20:00 цагийн хооронд “Тохь” хэмээс фитнесс төвөөр үйлчлүүлсэн байна. Одоогоор ойрын хавьтал гэсэн 52 иргэнийг олж тогтоож, шинжилгээнд хамруулсан. Эхний шинжилгээгээр бүх хариу сөрөг гарсан байна.

Үүнээс огт олдоогүй 3 хүний хаяг, байршлыг тогтоохоор ажиллаж байна. 71 хүнийг тусгаарлан ажиглах байранд, 1 хүнийг гэрт нь тусгаарлаж PCR шинжилгээнд хамруулсан. Энэ сарын 18-ны өдрөөс хойш Улаанбаатараас Дарханд ирсэн 900 орчим иргэн байна. Үүнээс Орхон, Хонгор, Шарын гол сумдад байгаа иргэдийн PCR шинжилгээ бүгд сөрөг гарсан. 

ЭМЯ, ХӨСҮТ-өөс өгсөн зөвлөмжид үндэслэн дараах шийдвэрийг Дархан-Уул аймгийн Онцгой комиссоос гаргажээ: 

• Дарханаас гарах болон сумдын хөдөлгөөнийг 7 хоног түр хязгаарлана.
• Иргэдэд үйлчилгээ үзүүлдэг төрийн байгууллагуудын үйл ажиллагааг мөн хязгаарлана.
• Уурхайн ажилчдыг Дарханаас өөрсдийнх нь зардлаар түргэвчилсэн шинжилгээ өгч гаргана.
• Хүнс тээврийн жолооч нар Дарханд өдөртөө шинжилгээ өгөөд явна. Улаанбаатараас ирэхдээ тухайн өдрийнхөө PCR шинжилгээтэй ирнэ.
• Дархан-Уул аймгийн Дархан суманд үйл ажиллагаа явуулдаг үсчин, гоо сайхан, фитнесс, спорт заал, бүжгийн клуб, бүх төрлийн дугуйлан секц, иога, спинниг, түр сургалт, теннисс биллиард, халуун ус, саун бассейн, баар паба, бүх төрлийн хүргэлтийн үйлчилгээг энэ сарын 29-нөөс 2 дугаар сарын 4-ний өдрийг дуустал түр хугацаагаар хязгаарлана.

---