Өмнөд Солонгост хууль бусаар оршин сууж буй бүх гадаадын иргэн коронавирусийн шинжилгээнд үнэ төлбөргүй бөгөөд нэрээ нууцлан хамрагдах боломжтой гэж тус улсын Хууль зүйн яам өнөөдөр мэдэгджээ.

Тус яамны албан ёсны мэдэгдэлд бичиг баримтгүй бөгөөд визний хугацаагаа хэтрүүлсэн зэрэг зөрчилтэй гадаадын иргэд зөвхөн гар утасны дугаараа бүртгүүлэн, орон нутгийн аль ч шинжилгээний төв дээр коронавирусийн шинжилгээ өгч болно хэмээн тэмдэглэжээ. Мөн гадаад иргэдийг ямар ч визний үзлэгт хамруулахгүй бөгөөд шинжилгээний өмнө ба дараа тэдний хэн болохыг Цагаачлалын албанд илтгэхгүй аж.

Энэ нь БНСУ-ын эрх баригчдын авч буй цар тахлын эсрэг арга хэмжээний нэг хэсэг бөгөөд тус улсад хууль бусаар оршин сууж буй гадаад иргэдийг барих ажиллагааг ч мөн түр хугацаагаар зогсоогоод байгаа юм. Одоогийн байдлаар Өмнөд Солонгост 400 мянга орчим хууль бус оршин суугч байгаа гэж албаныхан үзэж байна.

Эх сурвалж: Yonhap News Agency

---