Индонезийн хамгийн идэвхтэй галт уул болох Мерапи уул өнгөрөгч лхагва гарагт дэлбэрч, уулнаас доош 3,000 метрийн зайд их хэмжээний галт уулын хайлмаг, үнс хий урсаж эхэлжээ. Азаар хүний амь эрсдээгүй байна.

Дэлбэрэлтийн чимээ 30 км-ийн цаанаас сонсогдсон болохыг албаныхан мэдээлсэн юм. Эрх баригчид өнгөрсөн оны арваннэгдүгээр сард Мерапи уулын аюулын түвшнийг дээшлүүлсэн бөгөөд энэхүү дэлбэрэлтээр тус галт уулын хамгийн том хайлмагийн урсгал бүртгэгдсэн гэж Йогякарта хотын Галт уул судлал, геологийн аюулыг бууруулах төвийн тэргүүн Ханик Хумайда хэлжээ. Мерапигийн сүүлийн томоохон дэлбэрэлт 2010 онд тохиосон бөгөөд 347 хүний аминд хүрсэн юм.

Хэдийгээр албаныхан өнгөрсөн арваннэгдүгээр сард Магеланг, Слемен дүүргийн ууланд амьдардаг 2,000 орчим хүнийг нүүлгэн шилжүүлсэн боловч ихэнх нь буцаж ирээд байжээ. Дэлбэрэлтийн дараа галт уулын тогооноос таван км-ийн зайд амьдардаг 150 гаруй хүнийг хорогдох байр луу нүүлгэн шилжүүлсэн бөгөөд тэдний ихэнх нь өндөр настан байсан аж.

2,968 метрийн өндөртэй Мерапи галт уул нь эртний Йогякарта хотын ойролцоо хүн ам шигүү суурьшсан Ява арал дээр байдаг бөгөөд Индонезийн олон арван галт уул дундаас хамгийн идэвхтэй нь юм. 270 сая хүн амтай Индонез улс нь Номхон далайн "Галын цагираг" дагуу оршдог тул газар хөдлөлт, галт уулын дэлбэрэлтэд өртөмтгий байдаг байна.

Эх сурвалж: Associated Press

---