УИХ-ын нэгдсэн чуулганаар Монгол Улсын Ерөнхий сайдад нэр дэвшигчийг хэлэлцэж байна.

Монгол Улсын Ерөнхийлөгч Халтмаагийн Баттулга өнөөдөр /2021-01-27/ Лувсаннамсрайн Оюун-Эрдэнийг Монгол Улсын Ерөнхий сайдаар томилох саналаа УИХ-ын дарга Г.Занданшатарт албан бичгээр хүргүүллээ.

УИХ-ын 2020 оны ээлжит сонгуулийн дүнгээр байгуулагдсан Засгийн газрыг огцруулсан тул Монгол Ардын намаас Лувсаннамсрайн Оюун-Эрдэнийг Монгол Улсын Ерөнхий сайдад нэр дэвшүүлэн, 2021 оны 1 дүгээр сарын 22-ны өдөр Монгол Улсын Ерөнхийлөгчид өргөн мэдүүлсэн.

Үндсэн хуулийн Гучин есдүгээр зүйлийн 2 дахь хэсэгт заасны дагуу Монгол Улсын Ерөнхийлөгч Халтмаагийн Баттулга Монгол Улсын Ерөнхий сайдыг томилох саналыг УИХ-д оруулж, холбогдох хууль, тогтоомжийн дагуу хэлэлцэн шийдвэрлэхийг хүсчээ.

Монгол Улсын 32 дахь Ерөнхий сайдад нэр дэвшигч Л.Оюун-Эрдэнийн товч намтар

Л.Оюун-Эрдэнэ нь 1980.06.29 төрсөн. Ам бүл 5 эхнэр хүүхдүүдийн хамт амьдардаг.

1998 онд Хэнтий аймгийн Бэрх хотын ЕБС, 2001 онд Бэрс дээд сургуулийг сэтгүүлч мэргэжлээр,

2008 онд МУИС-ийн Хууль зүйн сургуулийг Эрх зүйч мэргэжлээр тус тус төгссөн.

2015 онд Харвардын Их сургуульд Төрийн удирдлагын магистрын зэрэг хамгаалсан.

Ажлын туршлага: 2001 он Хэнтий аймгийн Бэрх хотын захирагчийн албанд Тамгын газрын дарга, 2002 он “Дэлхийн Зөн Монгол” ОУБ-ын Хэнтий салбарын захирал, 2006 он “Дэлхийн Зөн Монгол” ОУБ-ын Бүс хариуцсан Захирал, 2008 онд Нийслэлийн БЗД- т Нийгмийн хөгжлийн хэлтсийн дарга, 2009 онд МАН-ын УЗ-ийн ХЭГ-ын дарга, 2010-2014 он НАМЗХ-ны Ерөнхийлөгч, 2011 он МАН-ын нарийн бичгийн дарга, 2012 он МАН-ын ЕНБД-ын үүрэг гүйцэтгэгч, 2016 оноос УИХ-ын гишүүн, 2019 оноос Монгол Улсын сайд, ЗГХЭГ-ын дарга, 2020 оноос УИХ-ын гишүүнээр тус тус ажиллаж байна.

Л.Оюун-Эрдэнийг МАН-аас 2021 оны 1 дүгээр сарын 22-ны өдөр Монгол Улсын 32 дахь Ерөнхий сайдаар нэр дэвшүүлэхээр Монгол Улсын Ерөнхийлөгчид өргөн мэдүүлсэн билээ. 

 

 

---