АНУ-ын Ерөнхийлөгч Жо Байден энэ зуны турш болон намрын эхэн сар гэхэд 300 сая иргэнийг коронавирусийн эсрэг вакцинжуулалтад хамруулах амлалт өглөө. АНУ коронавирусийн тархалтаар дэлхийд тэргүүлж байгаа бөгөөд тус улсын 26 сая гаруй иргэн халдварлаж, 435,000 иргэн нас бараад байгаа юм.

Шинэ Ерөнхийлөгчийн ажлын алба Пфайзер болон Модернагаас 200 сая гаруй тун вакцин нэмж худалдаж авах ба мужуудад вакцины нийлүүлэлтийг нэмэгдүүлэхээр төлөвлөж байна. Мөн вакцины хүртээмж, түгээлтийг хурдасгаж, хүргэлтийг сайжруулахаар ажиллаж байгаа ажээ.

Нэн түрүүнд хоногт 1,4 сая тунг, ирэх гурван долоо хоногийн хугацаанд долоо хоногт 10 сая тунг нийлүүлэхээр төлөвлөж байна. Байден тангараг өргөхийнхөө өмнө 100 хоногт 100 сая тун вакцин тарих амлалтыг өгсөн юм.

Мягмар гарагийн орой хийсэн мэдэгдэлдээ Жо Байден вакцинжуулах хөтөлбөрийн нөхцөл байдал таамаглаж байснаас ч муу байсан гэдгийг онцлон тэмдэглэжээ. Коронавирусийн нөхцөл байдлын үед хоёр их наяд ам.долларын тусламжийн багц гаргах саналыг Конгресст танилцуулсны дотор вакцинжуулах хөтөлбөрт илүү их төсөв хөрөнгө зарцуулахыг уриалж байна.

Өнөөдрийн байдлаар АНУ-д 19 сая хүн коронавирусийн вакцины нэг тунг хийлгэсэн бол 3,4 сая хүн хоёр дахь тунгаа тариулжээ. Жо Байдены тооцоолсноор халдварын тархалтыг бүрэн хяналтандаа авах хүртэл эндэгдлийн тоо 660,000-д хүрч болзошгүй гэж анхааруулжээ.

Эх сурвалж: The Guardian

---