Хүүхдээ хүчирхийлэлд өртсөн гэж сэжиглэн, өдөр өнжүүлэх төвийнх нь хяналтын камерын бичлэгийг үзэхийг хүссэн эцэг эхээс Өмнөд Солонгосын Пусан хотын цагдаа нар 100 сая вон шаарджээ.

Улсын өдөр өнжүүлэх төвд явдаг хүүхэд нь хүчирхийлэлд өртсөн байж болзошгүй талаар эцэг эх нь саяхан Пусаны Гижанг цагдаагийн газарт мэдээлсэн бөгөөд сүүлийн хоёр долоо хоногийн хяналтын камерын бичлэгийг үзэх хүсэлт гаргасан байна. Гэвч цагдаагийн алба хаагчид тэднээс ийнхүү их хэмжээний төлбөр шаардсан гэнэ.

БНСУ-ын Хувийн нууцлалын тухай хуулийн дагуу хүсэлт гаргасан эцэг эхийн хүүхдээс бусад бичлэг дээрх бүх хүнийг бүрэлзүүлэх шаардлагатай бөгөөд 100 сая вон нь бичлэгийг засварлах зардал аж. Бичлэг дээрх бүх хүн зөвшөөрөл олгосон тохиолдолд л бичлэгийн эх дүрсийг үзүүлж болох байна. Цагдаагийн газраас "Тухайн эцэг эхээс хүлээн авсан хүсэлтийн дагуу нууц мэдээлэл ил болгох шаардлагатай байсан тул бид нэгэн видео компаниас бичлэгийг засварлах зардлын тооцоог гаргахыг хүссэн. Холбогдох бичлэг нь 174 гигабайтын маш том хэмжээтэй байсан тул засварлах ажиллагаанд 100 гаруй сая вон зарцуулна гэж компанийн зүгээс мэдэгдсэн. Бид үүнийг хүсэлт гаргасан эцэг эхэд хэлсэн" гэжээ.

Ингээд энэ өндөр төлбөрийг төлөх чадваргүй эцэг эх хоёр эцэст нь хяналтын камерын бичлэгийг үзэж чадаагүй байна. Хэдийгээр тэд өдөр өнжүүлэх төвөөс санал болгосон бичлэгийг үзсэн ч хүүхдээс нь бусад хүнийг хэтэрхий их бүрэлзүүлсэн байсан тул зөвхөн бүдэг бадаг хэлбэртэй дүрснүүд л харагдаж байжээ.

Хүсэлт гаргасан ээж "Би ерөөсөө бичлэгийг тарааж, өдөр өнжүүлэх төвийг буруутгах гээгүй. Зөвхөн хяналтын камерын бичлэгийг үзэхийг л хүссэн. Надаас ийм их хэмжээний мөнгө шаардаж байгаа цагдаа нарыг ойлгохгүй байна. Өдөр өнжүүлэх төвөөс ирүүлсэн бичлэг нь бараг тэр чигээрээ бүрэлзсэн байсан тул юуг ч ялгаж салгаж харах боломжгүй байсан" хэмээн ярьсан юм.

Тэгвэл энэхүү эцэг эхийн хуулийн төлөөлөгчид холбогдох цагдаагийн байгууллагыг "Хувийн нууцлалын тухай хуулийг буруу тайлбарласан" гэж буруутган, хуульд хэтэрхий эмзэг хандсан гэж шүүмжилжээ. Мөн хяналтын камерын бичлэгийг үзэх эрхтэй хүүхдийн асран хамгаалагчдыг өндөр төлбөрөөр дамжуулан бичлэгийг үзэхээс сэргийлж байна гэж үзэж байгаа аж.

Эх сурвалж: The Korea Times

---