Коронавирусийн цар тахлаас урьдчилан сэргийлэх үйлчилгээтэй гэх ургамлын гаралтай хандыг сурталчилж байсан Шри Ланкын Эрүүл мэндийн сайд Павитра Ванниараччи халдвар авчээ. Түүний шинжилгээний хариу өнгөрсөн долоо хоногийн баасан гарагт "Эерэг" гарсан гэж Эрүүл мэндийн яамны Хэвлэл мэдээллийн нарийн бичгийн дарга "ВВС" агентлагт мэдээлсэн юм.

Уг ургамлын хандыг тус улсын нэгэн бөө үйлдвэрлэсэн бөгөөд жорыг нь зүүдэндээ харсан гэж хэлжээ. Тэрээр зөгийн бал, задийн самар агуулсан уг хандыг коронавирусийн эсрэг насан туршийн хамгаалалт болно хэмээн мэдэгдсэн гэнэ. Харин Эрүүл мэндийн сайд болох Ванниараччи энэхүү хандыг олон нийтийн өмнө уун, вирусийн тархалтыг зогсоох арга зам хэмээн сурталчилж байжээ.

Павитра Ванниараччи нь цар тахлын халдвар авсан тус улсын дөрөв дэх сайд болж байна. Түүнээс өмнө хандыг сурталчилж байсан өөр нэгэн сайд коронавирусээр өвчилсөн юм. Ванниараччи одоо тусгаарлалтад ороод байгаа бөгөөд түүний ойрын хавьтлуудыг мөн тусгаарлаад байгаа аж.

Шри Ланкын эмч нар ургамлын хандыг үйлчилгээтэй гэдгийг няцаасан хэдий ч олон мянган хүн бөөгийн амьдардаг тосгонд очин, хандыг олж авсан байна. Цар тахал эхэлснээс тус улсад халдварын нийт 56,076 тохиолдол бүртгэгдэж, 276 хүн нас барсан бөгөөд сүүлийн саруудад халдварын тархалт өсөж байгаа юм. Ванниараччи халдвар авсан нь ил болохоос хэдхэн цагийн өмнө Шри Ланка улс "Oxford/AstraZeneca" вакцины яаралтай хэрэглээг зөвшөөрсөн бөгөөд эхний тунгууд ирэх долоо хоногт тус улсад ирэх төлөвтэй байна.

Эх сурвалж: BBC

---