Австралийн Квинсленд мужид 18 хоногийн турш сураггүй алга болоод байсан эрэгтэйг цагдаа нар эсэн мэнд олсон бөгөөд тэрээр далангийн ус ууж, мөөг түүж идэн амь гарсан байна.

58 настай Роберт Вебер хамгийн сүүлд энэ сарын 6-ны өдөр Килкиван хотын нэгэн зочид буудлаас нохойтойгоо гарч яваа харагджээ. Гэвч удалгүй түүний автомашин нь фермийн замд суусан аж. Тэрээр гурван өдөр машиндаа байсан бөгөөд уух усгүй болсныхоо дараа явган явахаар шийджээ. Ингээд Вебер төөрсөн хэдий ч далангийн ойролцоо байж, "Газар унтаж, далангийн ус уун, мөөг идэж" амьд үлджээ.

Веберийг олохоор өргөн цар хүрээний агаар болон хуурай газрын хайх ажиллагааг эхлүүлээд байсан хэдий ч амжилт олоогүйн улмаас өнгөрсөн долоо хоногт хайлтыг цуцалсан байна. Азаар далангийн ойролцоох нэгэн үл хөдлөх хөрөнгийн эзэн түүнийг өнгөрөгч ням гарагт олсон гэнэ. Орон нутгийн парламентын гишүүн Тони Перретт эхнэрийн хамт үхэр ферм дээрээ нэгжлэг хийж байгаад ноён Веберийг олжээ. "Тэр далангийн ойролцоох модны дор суугаад, бидэн рүү даллаж байсан" гэж Перретт "ABC" сувагт ярьсан юм.

Роберт Вебер наршсан хэдий ч биеийн байдал нь сайн, аливаа байдлаар гэмтээгүй байсан гэж цагдаа нар мэдэгджээ. Харамсалтай нь түүний нохой олдоогүй байна.

Эх сурвалж: BBC

---