Хятадын эдийн засгийн өсөлт 2020 онд таамаглаж байснаас өндөр өссөн дүнг харуулжээ. Дэлхий даяар коронавируст цар тахлын улмаас эдийн засгийн хямралд өртөөд байгаа ч Хятадын эдийн засаг 2,3 хувиар өссөн байна.

Олон улсын валютын сан Хятадын эдийн засгийн өсөлт 2020 онд 1,9 хувь хүрч буурна хэмээн тооцоолж байсантай харьцуулахад өндөр үзүүлэлт гарлаа гэж үзэж байна.

Цар тахлын хөл хорио тогтоосон даруйд Засгийн газар эдийн засгаа аврахын тулд дэд бүцтийн томоохон төслүүдийг хэрэгжүүлж, бэлэн мөнгөний эргэлтийн сайжруулсан нь үр дүнгээ өгсөн гэж шинжээчид дүгнэж байна. Эдийн засгийн өсөлтийг барихад аж үйлдвэрийн бүтээгдэхүүн голлох байр суурь эзэлсэн гэж үзжээ.

Дэд бүтэц, үл хөдлөх хөрөнгийн салбарт хөрөнгө оруулалтаа өсгөсөн нь зөвхөн Хятадаас гадна тус улстай худалдаа эрхэлдэг Австрали, Өмнөд Солонгос, Япон зэрэг улс орнуудад дэмжлэг болжээ.

Хятадын Засгийн газрын хөрөнгө оруулалт 2019 онтой харьцуулахад 27 хувиар өсч, 535 тэрбум ам.долларт хүрсэн гэж өнгөрсөн баасан гарагт танилцуулсан статистик мэдээлэлд дурдсан байна. Энэ нь эдийн засгийн өсөлт удааширсан ч эргэн сэргэлт хурдацтай байгааг харууллаа гэж шинжээчид үзэж байна.

Эх сурвалж: CNN

---