Украин улсын зарим өндөр албан тушаалтан нууцаар коронавирусийн эсрэг вакцин тариулсан гэх мэдээлэл тархаж, Ерөнхийлөгч Владимир Зеленский уг хэргийг яаралтай шалгаж эхлэхийг үүрэг болгожээ.

Тус улсын зарим хууль тогтоогчид нийслэл Киев хотын хувийн эмнэлэгт "Pfizer-BioNTech" вакциныг тариулсан гэж нэгэн бизнес эрхлэгч өөрийн мэдээллийн вэбсайтад мэдэгдсэн байна. Одоогийн байдлаар Украин улс коронавирусийг ямар ч вакциныг албан ёсоор импортлоогүй байгаа билээ.

Эх сурвалжийн мэдээллийн дагуу вакцинуудыг өнгөрсөн оны арванхоёрдугаар сарын сүүлчээр Израилаас ирсэн тусгай үүргийн онгоцонд тээвэрлэн, Украинд хууль бусаар оруулж ирсэн аж. Вакцин тариулсан хүмүүс хоёр тунгийн тус бүрийг нь 2,500 евро буюу найман сая гаруй төгрөгөөр худалдаж авсан байна.

Тэгвэл Ерөнхийлөгч Зеленский энэ талаар "Би Аюулгүй байдлын алба болон бусад хууль сахиулагчдад коронавирусийн эсрэг вакциныг Украин руу хууль бусаар нэвтрүүлсэн гэх мэдээллийг нэн даруй шалгахыг даалгасан. Хэрэв хэн нэгэн үнэхээр вакциныг хууль бусаар зарж борлуулах зорилгоор импортолсон бол хариу арга хэмжээ нь аль болох хатуу байх ёстой. Хууль бусаар хил нэвтрүүлсэн хэргээр шийтгэл ногдуулах ёстой" гэж өөрийн "Телеграмм" хуудаст бичжээ.

Ерөнхий сайд Денис Шмигаль мөн өөрийн "Телеграмм" хуудаснаа хууль бусаар вакцин хийлгэсэн хэргийг шалгахыг Эрүүл мэндийн яам, Дотоод хэргийн яаманд даалгасан гэж мэдэгдсэн юм. Тэрээр "Би вакцинжуулалтыг дэмждэг... Манай улсад коронавирусийн вакцин албан ёсоор ирэхэд би вакцинжуулалтын хоёр, гуравдугаар шатанд өөрийн зардлаар тариулах болно" хэмээн тэмдэглэсэн байна.

Украины Засгийн газар одоог хүртэл илүү найдвартай гэж тооцогдож буй барууны вакцинуудыг худалдаж авах гэрээг эцэслэн шийдээгүй байгаа нь ихээхэн шүүмжлэл амсаж байгаа. Одоогийн байдлаар тус улс нь БНХАУ-ын "Sinovac Biotech" компанийн вакцины 1.9 сая тунгийн эхний багцыг хүлээж байгаа аж.

Денис Шмигаль үргэлжлүүлэн "Одоогийн байдлаар Украинд аль ч вакциныг баталгаажуулаагүй байгаа. Ямар ч ухаантай хүн гарал үүсэл нь тодорхойгүй вакциныг тариулахгүй гэдэгт би итгэлтэй байна" хэмээжээ.

Эх сурвалж: euronews.com

---